Тошковски: Од утре младите кои наполниле 18 години ќе може да се фотографираат за лична карта без термин

„Во делот на производство на пасошите, ова е фактичката состојба. Тоа е реалноста. За издавање на пасошот по итна постапка се чека до една недела, а по редовна постапка се чека минимум два месеци“, рече министерот во техничката влада

Во текот на денешниот ден Министерството за внатрешни работи отпочнува акција со која се повикуваат сите млади граѓани кои само што наполните 18 години или ќе наполнат 18 години до одржувањето на претседателските и парламентарните избори на 24 април и 8 мај да се упатат до пунктовите низ државата за да се фотографираат за лична карта, со која ќе можат да го остварат своето гласачко право. Ова денеска го најави министерот за внатрешни работи во техничката влада Панче Тошковски со што, како што рече, ќе им се излезе во пресрет на оваа група граѓани, за чиј број министерот рече дека е е голем и обемот на издавање на лични карти за нив може да се сработи за еден ден.

„Во градот Скопје тоа е пунктот „Пролет“. Веќе од утре тие ќе можат да се фотографираат за лична карта. Таа ќе биде изработена во разумен рок и со неа ќе можат да се легитимираат на избирачките места и да го остварат правото на глас. Предност ќе им се даде на оние млади луѓе кои немаат патна исправа, а сакаа да обезбедат лична карта“,

рече тој.

Според него, не станува збор за голем број луѓе кои, како што рече, до пред одреден временски период биле околу 1 100 на територија на државата, а сега се околу 500 лица.

„Оваа бројка може да се сработи за еден ден, во однос на печатење на личните карти. Некаде околу 4 000 лични карти можеме да ги произведеме дневно“,

вели Тошковски.

ДИК: Граѓаните што ќе наполнат 18 години помеѓу двата круга на претседателските избори на 8 мај ќе може да гласаат само за избор на пратеници

Во однос на динамиката на изработка на личните документи, Тошковски рече дека се работи со целосен капацитет, дека се дава максимумот, но посочи и дека не очекува да се зголеми во периодот што следува.

„Во делот на производство на пасошите, ова е фактичката состојба. Тоа е реалноста. За издавање на пасошот по итна постапка се чека до една недела, а по редовна постапка се чека минимум два месеци“,

вели тој.

Според него, периодот на чекање за изработка на личните документи во иднина може само да се зголеми.

„Тесното грло во моментот е производството на пасошите. Имаме две машини, тие на ден можат да произведат над 3 000 пасоши, со работа во две смени. Тоа е максимумот. Гледавме да набавиме уште една машина, но наредните четири, пет месеци ова ќе биде фактичката состојба во однос на изработката на пасошите. Кога требаше македонската јавност да биде навремено известена дека во наредните пет години нема да важат пасошите, тоа не се случило“,

рече Тошковски.

Според него, безбедносната состојба на територијата на државата е стабилна.