Во срцето на најновиот предлог, што го дискутираа американскиот претседател Доналд Трамп и арапските лидери во ОН оваа недела, е идејата Газа да биде управувана од преодно тело поддржано од ОН и од земјите од Заливот, пред власта да им се врати на Палестинците
Поранешниот британски премиер Тони Блер е во преговори да ја предводи преодната власт во Газа доколку се постигне прекин на огнот, објави Би-би-си. Блер, кој ја предводеше Велика Британија во војната во Ирак во 2003 година, учествува во разговори на високо ниво со сите страни за да се стави крај на војната и да се испланира иднината на палестинската територија по конфликтот.
Во срцето на најновиот предлог, што го дискутираа американскиот претседател Доналд Трамп и арапските лидери во ОН оваа недела, е идејата Газа да биде управувана од преодно тело поддржано од ОН и земјите од Заливот, пред власта да им се врати на Палестинците.
Една опција е Блер да ја предводи власта, иако неговата канцеларија нагласи дека нема да поддржи ништо што би ги протерувало жителите на Газа.
Во август, поранешниот британски премиер присуствуваше на состанок во Белата куќа со Трамп за да разговараат за повоените планови за Газа, а специјалниот претставник на САД за Блискиот Исток, Стив Виткоф, го опиша состанокот како многу сеопфатен, но не беа објавени дополнителни детали.
По напуштањето на функцијата во 2007 година, Блер помина неколку години како претставник за Блискиот Исток за Квартетот на меѓународни сили (САД, ЕУ, Русија и ОН), фокусирајќи се на палестинскиот економски развој и поставувајќи услови за решение со две држави.
Улогата на Хамас во идното управување со Газа е отфрлена
Разговорите за неговата улога во преодната власт за Газа доаѓаат откако палестинскиот претседател Махмуд Абас вчера изјави дека е подготвен да соработува со Трамп и други светски лидери за спроведување на мировен договор за две држави. Абас ја отфрли улогата на Хамас во идното управување со Газа и побара негово разоружување, објави Би-би-си.
Претходно оваа недела, Велика Британија официјално ја призна државата Палестина, заедно со Канада и Австралија, по што следеа и други земји како Франција и Данска, додека Израел и САД го критикуваа потегот како награда за Хамас.
Стармер нагласи дека овој дипломатски потег значи дека Хамас нема иднина, нема улога во владата или безбедноста и е спротивен на нивната „визија исполнета со омраза“.
Израелската војска ја започна кампањата во Газа како одговор на нападот на Хамас врз јужен Израел на 7 октомври 2023 година, кога околу 1 200 луѓе, претежно цивили, беа убиени, а 251 лице беа земени како заложници.
Оттогаш, најмалку 65 419 луѓе се убиени во израелски напади во Газа, според бројките од здравствените власти предводени од Хамас. Истражна комисија на Обединетите нации прогласи дека Израел врши геноцид врз Палестинците, тврдење што Израел го негира.