Играјќи по нотите на Мицкоски, Апасиев ја направи првата поголема стратегиска грешка, затоа што доколку Левица учествуваше на изборите во Штип, во услови на бојкот на ВМРО-ДПМНЕ, имаше добри шанси да капитализира доволно гласови, коментира поранешниот функционер на сега опозициската партија
Мицкоски никогаш нема да ѝ донесе победа на ВМРО-ДПМНЕ над СДСМ. Никогаш. Сакајте верувајте, сакате не верувајте. Да не речете после не сум ви кажал. Причината веќе на секој еден човек во државата му е јасна, Мицкоски е омилениот вмровец на СДСМ, работи за интересите на СДСМ, а против интересите на ВМРО-ДПМНЕ, оценува Никола Тодоров, поранешен висок функционер на ВМРО-ДПМНЕ во колумна за Дојче веле.
Тодоров посочува дека, исто како и ВМРО-ДПМНЕ, Левица реши да не учествува на изборите во Штип, што, според него, упатува на синхронизираност во потезите на двете партии.
„Некои велат целта му е да ја уништи ВМРО-ДПМНЕ и потоа заедно со Гордана Силјановска да си преминат во Левица. Затоа и усогласено со Левица ги бојкотираат изборите во Штип. Тука, морам да напоменам дека Апасиев, лидерот на Левица, е неспоредливо похаризматичен лидер од Мицкоски и со далеку поголем политички потенцијал, но мислам дека сега, играјќи по нотите на Мицкоски, ја направи првата поголема стратегиска политичка грешка, затоа што доколку Левица учествуваше на изборите во Штип, во услови на бојкот на ВМРО, имаше добри шанси да победи или пак да капитализира доволно гласови за да може да очекува супер резултат на изборите во октомври 2021 година. Но тоа е нивен проблем“,
коментира Тодоров во колумната „Мицкоски, омилениот вмровец на СДСМ“.