„Блумберг“ претходно објави дека кинеските власти се во прелиминарни разговори за потенцијална продажба за да се избегне забраната што треба да стапи во сила доколку кинескиот сопственик „Бајт денс“ (ByteDance) не го продаде својот бизнис во САД до 19 јануари
Тик-ток ги отфрли како „чиста фикција“ тврдењата дека кинеската влада размислува да ја продаде платформата на милијардерот Илон Маск за да избегне забрана во САД.
„Блумберг“ претходно објави дека кинеските власти се во прелиминарни разговори за потенцијална продажба за да се избегне забраната што треба да стапи во сила доколку кинескиот сопственик „Бајт денс“ (ByteDance) не го продаде својот бизнис во САД до 19 јануари.
Во извештајот, во кој се цитираат неименувани луѓе запознаени со ова прашање, се вели дека едно сценарио за кое се дискутира би вклучувало спојување на Тик-ток со платформата Икс на Маск.
„Блумберг“ наведе дека не е јасно како Маск, најбогатиот човек во светот, со проценета вредност од повеќе од 400 милијарди долари, ќе ја изврши оваа трансакција и дали ќе мора да продаде некоја од неговите други компании за да го купи Тик-ток.
Коментирајќи ги наводите на „Блумберг“, портпаролот на Тик-ток во изјава за Ал Џезира рече дека не може да се очекува да коментираат „чиста фикција“.
Врховниот суд на САД ја разгледува уставноста на евентуалната забрана, откако Тик-ток поднесе правен приговор против Законот за заштита на Американците од апликации што ги контролираат други земји (Foreign Adversary Controlled Applications Act).
За време на усните расправи во петокот, судот се чинеше дека е склон да ја потврди забраната, при што повеќето судии не беа убедени во аргументот на Тик-ток дека присилната продажба би го прекршила првиот амандман на Уставот на САД, кој ја гарантира слободата на говорот.
Претседателот во заминување Џозеф Бајден го потпиша законот за Тик-ток во април 2024 година, поради загриженоста за наводните ризици за националната безбедност.
Демократските и републиканските пратеници изразија загриженост дека платформата може да се користи за собирање лични податоци на Американците и манипулирање со јавниот дискурс.
Новоизбраниот претседател Доналд Трамп, чија инаугурација е на 20 јануари, за време на претседателската кампања вети дека ќе ја спаси платформата, што е пресврт од обидот за време на неговиот прв мандат да ја забрани апликацијата.
Маск и неговите претставници не одговориле на барањето за коментар. Во април, Маск објави дека верува дека Тик-ток треба да остане достапен во САД.
„Според мое мислење, Тик-ток не треба да биде забранет во САД, иако таквата забрана може да биде од корист за платформата Икс“,
напиша Маск на Икс.
In my opinion, TikTok should not be banned in the USA, even though such a ban may benefit the 𝕏 platform.
— Elon Musk (@elonmusk) April 19, 2024
Doing so would be contrary to freedom of speech and expression. It is not what America stands for.