Градоначалничката на Тетово, Теута Арифи не е кандидатка за амбасадорка во Вашингтон, изјави денеска премиерот Зоран Заев.
Тој одговарајќи на новинарско прашање на настанот за проширување на улицата „Никола Карев“, позната како Пластичарска, истакна дека Арифи е негова пријателка, ја поддржува во активностите како градоначалник на Тетово, се реализираат повеќе проекти, но таа не е ниту понудена како кандидат за Вашингтон, ниту пројавила интерес.
„За Теута Арифи воопшто не е разговарано. Таа е мој пријател, ја поддржувам, и помагаме во делот на Тетово, се реализираат проекти, развиваме сериозни големи инвестиции во Тетово, но таа ниту изразила желба, ниту некаде е понудена како кандидат“, рече Заев.
Во врска со тоа до каде е проценудата за именување кандидат за амбасадор во Вашингтон, Заев рече дека има квалитетни кандидати, но сè уште немаат консолидирана одлука.
„Знаете амбасадорската постапка прво е политичка, потоа е професионална. Министерот за надворешни работи разговараше и со претседателот и со мене и со други важни личности. Верувам дека во брзо време ќе најдеме решение. Вчера донесовме одлука за 21 кандидат и тоа е само дел од постапката“, рече Заев.
Одлуката на владата, претседателот Стево Пендаровски формално сè уште не ја добил.
Пред да бидат испратени идните амбасадори, изјави денеска Пендаровски,, треба да се завршат уште некои процедури, а тие исто така треба да ја презентираат својата програма пред надлежната собраниска комисија.
„И понатаму ќе се барат агремани од државите во кои ќе сакаме да ги пратиме. Тука има една временска одредница, која јас ја имав спомнав и порано, а сакам и сега да ја посочам. Се ближат избори, на 3 јануари доаѓа техничката влада, а многу битен датум е датумот на распуштање на Собранието и мислам дека тоа ќе биде околу 11, 12 февруари. По тој датум не можете ниту да вработите, ниту да унапредите кој било службеник во државната администрација, а не пак да праќате амбасадори“, рече шефот на државата.
Тој додаде дека испраќањето на амбасадорите треба да заврши до таа временска одредница.
„Кој ќе отиде ќе отиде, потоа не заради моја политичка волја, туку затоа што законот забранува по распуштањето на Собранието да се праќаат амбасадори. Значи ќе се чека. Ако до тој момент некој не е отиден во дестинацијата за која е определен, тогаш ќе се чека да заврши и кампањата и изборите да се формира нова влада, значи да заврши целиот тој изборен период“, истакна Пендаровски.