„Со објавата која имала навредлива, омаловажувачка, но и заканувачка содржина кај оштетената предизвикал чувство на вознемиреност и страв“, велат од Јавното обвинителство
Четириесет и осумгодишен тетовец е осомничен дека пред три дена преку објава на социјалните мрежи упатил закани кон жена и кон функционери од една политичка партија дека ќе ги убие и ќе изврши други тешки кривини дела врз нив.
Против него е поведена постапка од страна на Основното јавно обвинителство Тетово, а Судот му определил мерка притвор.
Како што информираа од Јавното обвинителство, осомничениот се товари за кривичното дело загрозување на сигурноста според член 144 став 5 од Кривичниот законик (КЗ).
Според краткиот опис на делото, осомничениот на 28 октомври од профил на социјалната мрежа Фејсбук објавил видео и текст на албански јазик во кој отворено се заканил со убиство и други тешки кривични дела кон една жена и кон функционери на една политичка партија, како и кон лица со политичко уверување.
„Со објавата која имала навредлива, омаловажувачка, но и заканувачка содржина кај оштетената предизвикал чувство на вознемиреност и страв“,
се вели во соопштението од Јавното обвинителство на Република Северна Македонија.
Ценејќи ги сите околности, јавен обвинител до судија на претходна постапка од Основниот суд во Тетово поднел предлог за определување мерка притвор за осомничениот, кој Судот го прифатил и ја определил мерката за обезбедување присуство.