Во возилото имало седум лица без документи, сите по нивни искази, државјани на Египет, на возраст од 17 до 52 години. Се превезувале од Гевгелија до Куманово
На автопатот Скопје–Куманово, кај наплатната рампа Романовце, околу два часот по полноќ, при вршење мото-патролна дејност од страна на полициски службеници од Мобилната единица за безбедност на сообраќајот на патиштата при Секторот за сообраќајни работи, било сопрено патничко моторно возило „фолксваген шаран“ со тетовски регистарски ознаки, управувано од С.И.(44) од Тетово, информира Министерството за внатрешни работи.
При контролата во возилото, како што велат од МВР, биле забележани лица кои немале никакви документи за идентификација.
„Во разговор со возачот, тој посочил дека требало да ги превезе лицата од Гевгелија до Куманово. Во возилото се превезувале седум лица, сите по нивен исказ државјани на Египет, на возраст од 17 до 52 години“,
се наведува во објавата на МВР.
Возачот и мигрантите се лишени од слобода, а по целосно документирање на случајот ќе биде поднесен соодветен поднесок.