Тој ги повика виничани да гласаат за кандидатот за градоначалник Ивица Димитров и советничката листа на СДСМ и коалицијата „Најдоброто“, ја нападна и опозициската ВМРО-ДПМНЕ велејќи дека оваа партија не може да испорача проекти на граѓаните бидејќи е изданок на режимот, а го прозва и нејзиниот лидер Христијан Мицкоски дека сега се разбудил од зимски сон
Зборувајќи дека покрај инвестирање во локалниот развој, се инвестирало и во човечкиот капитал преку зголемување на платите и пензиите, лидерот на СДСМ, Зоран Заев на партиски митинг во Виница најави тенденцијата е до крајот на годинава минималната плата да се зголеми на 18 000 денари.
„За четири години просечната плата ја зголемивме за 6 300 денари. Порано минималната плата беше од осум до девет илјади денари а денес таа изнесува 15 200 денари, со тенденција, до крајот на оваа година, за два и пол месеци отсега, таа да биде 18 000 денари. Да се донесе ваква одлука е потврда дека економијата се движи во добар правец“,
рече Заев.
Тој ги повика виничани да гласаат за кандидатот за градоначалник Ивица Димитров и советничката листа на СДСМ и коалицијата „Најдоброто“.
„Во Виница, почитувани граѓани, изминатите 4 години посветивме големо внимание на чиста и здрава животна средина. Исчистени се сите диви депонии во општина Виница. Со изградбата на регионалната депонија кај село Мечкуевци, Свети Николе, којашто треба да биде завршена до крајот на 2022 година, ќе ставиме крај на дивите депонии во Општина Виница. Во тек е доградба на филтер станица за прочистување на питка вода за Виница и водоснабдување на санитарна вода на село Лески. Изградивме во втора фаза, дел од водоводната мрежа во град Виница. Опремивме детска градинка за 100 дечиња. Изградивме спортска сала во основното училиште „Славчо Стојменски“. Во тек е изградбата на киносалата во Виница и во тек е изградбата на 38 социјални станови“
порача Заев.
Лидерот на социјалдемократите ја нападна и опозициската ВМРО-ДПМНЕ велејќи дека оваа партија не може да испорача проекти на граѓаните бидејќи е изданок на режимот, а го прозва и нејзиниот лидер Христијан Мицкоски.
„Го слушнавме прво Мицкоски, вели патриотизам било повеќе пари, нови инвестиции, нови работни места – е па добро утро од зимскиот сон Мицкоски. Мицкоски вчера пак, се сетил дека било храброст да се бориш за среќата на својот народ, за оваа држава да не се вртела 30 години во затворен круг. Е па уште едно ’Добро утро од зимскиот сон Мицкоски!‘. Повеќе од 10 години ги вртевте граѓаните и државата со панорамски тркала во круг и по 15 години – се сети, дека не е храброст да се качиш на панорамско тркало, туку да ја движиш државата напред. Само што вашето ’напред‘ е за криминалите назад. Стари режимски кадри и нова иднина не одат заедно! Не може луѓе свртени кон минатото да реализираат иднина, СДСМ инвестира во сегашноста и иднината и повеќе нема да дозволиме, ниту ние, ниту граѓаните, ВМРО-ДПМНЕ да ја растура државата“,
порача Заев од Виница.
Заев и СДСМ вечерва имаа предизборни активности и во Берово, Пехчево, Македонска Каменица и Кочани.