„Основната заложба на оваа влада е етничкиот предзнак да не биде принцип за вработување. Дојдено е време во администрацијата да се вработуваат луѓе врз база на знаење и квалитет, со цел да имаме силна и ефикасна јавна администрација“, рече министерот за јавна администрација
Темата за балансерот е завршена, архивирана и се спроведува. Не се прави ништо намерно, ниту се провоцира, туку единствено се почитуваат законите. Ова денеска го изјави министерот за јавна администрација Горан Минчев по реакциите на коалицијата „Вреди“ дека со неговата одлука да ги врати на доработка годишните планови за вработување на институциите во јавниот сектор, на кои им порача да го почитуваат новиот начин на пресметка на балансерот, гради антиалбанска доктрина.
Според Минчев, во законот јасно стои дека алатката баленсер се применува исклучиво на резидентното население што живее на територијата на државата, согласно податоците на последниот попис.
„Не постои ништо што е намерно. Или ќе се почитува закон или нема да се почитува закон. Јас како министер сум должен да го почитувам законот и тоа ќе го правам се додека сум на оваа функција. Стриктно е наведен членот за пресметката во балансерот дека се однесува исклучиво на резидентното население на територијата на Република Северна Македонија, односно сите жители кои живеат на територијата на Република Северна Македонија ќе бидат во формулата за пресметка на баленсерот“,
рече тој.
Посочи дека нема намера да го провоцира коалицискиот партнер, особено зашто еден од принципите на кои е договорена коалицијата е токму почитување на законите.
„Исклучиво спроведуваме закони. Во Законот за вработени во јавниот сектор децидно пишува дека алатката балансер се применува исклучиво за граѓаните што живеат на територија на Република Македонија, а тоа е резидентното население согласно податоците на последниот попис“,
вели министерот.
За реакциите за балансерот од страна на коалициските партнери во Владата, Минчев порача оти се надева дека колегите од „Вреди“ ќе се вразумат, па ќе потрошат повеќе внимание на читање на постоечките закони и ќе се посветат на спроведување на овие закони, а нема да се занимаваат со дневнополитички теми.
„Основната заложба на оваа влада е етничкиот предзнак да не биде принцип за вработување. Дојдено е време во администрацијата да се вработуваат луѓе врз база на знаење и квалитет, со цел да имаме силна и ефикасна јавна администрација. Но тоа е второто начело, а првото начело е да имаме квалитетни закони, токму овие за кои денеска разговараме, за кои е исклучително важно да бидат применливи, да бидат системски закони. Ако го постигнеме тоа, тогаш можеме да разговараме за втората фаза, односно за добра и квалитетна администрација врз база на знаење и квалитет“,
рече Минчев.
Од 120 годишни планови за вработување, Минчев врати 115 на доработка, поради, како што рече, погрешно впишан процент на етничка задница, т.е. неусогласеност со новиот начин на пресметка на балансерот.
Според новиот начин на пресметка на балансерот, предвид се зема само бројот на резидентното население, а не и на нерезидентното население од пописот во 2021.
Коалицијата „Вреди“, составена од повеќе партии на Албанците, која е дел од владиниот состав заедно со ВМРО-ДПМНЕ и ЗНАМ, пред неколку дена остро реагираше на потегот на министер од редовите на партијата на Максим Димитриевски.
Оттаму обвинија дека кадрите на ЗНАМ имаат погрешна проценка дека ќе го создаваат својот политички идентитет на антиалбанска доктрина.
„Очекувавме дека министерот Минчев ќе ги поништи сите огласи според балансерот во кои Македонци се определуваа како Албанци за да се вработат во јавната администрација. Токму тоа е злоупотреба на балансерот кое неговото министерство не смее да го премолчува. Истовремено, порационално е Димитриевски и Минчев да направат список на државни институции во кои сè уште нема пристап за Албанците. Намалувањето на процентите на Албанците е предизборен фолклор и аргумент плус зошто е неопходно да се укине балансерот и да се донесе Закон за правична застапеност. Со таков пристап ќе се елиминира некои политичари како Димитриевски и Минчев да одлучуваат колку и какви Албанци ќе се вработуваат во јавната администрација!“,
се вели во реакцијата на „Вреди“.
На одлуката на Минчев реагираше и потпретседателот на Алијансата за Албанците, Наим Бајрами, кој преку соопштение на фејсбук-профилот на партијата ги повика партиите на Албанците да ја напуштат Владата бидејќи, според него, промената на процентот на застапеност според балансерот значи реализација на сценаријата за деградација на Албанците во земјава.
Министерството за јавна администрација (МЈА) денеска од собраниска процедура ги повлече предлог-законот за административни службеници, предлог-законот за вработени во јавниот сектор и предлог-законот за стручно усовршување и обука на административните службеници поднесени од претходната влада и отвора широка дебата за овие закони во рамки на кампања под мотото „Сите заедно за професионална и квалитетна јавна администрација“.