Таткото барал оштетениот да му исплати одредена сума на пари за трошоци што тој ги покривал додека тројцата живееле заедно во изнајмен стан во населбата Карпош
Полициски службеници од Единицата за насилен криминал при СВР Скопје синоќа лишиле од слобода 57-годишен жител на селото Идризово, под сомнение за сторено кривично дело изнуда. Апсењето било извршено во угостителски објект, во моментот кога осомничениот примил претходно обележани пари.
Според информациите од Министерството за внатрешни работи, пријавениот почнал да му се заканува на 26-годишен маж, кој претходно бил во врска со неговата ќерка.
Таткото барал оштетениот да му исплати одредена сума на пари за трошоци што тој ги покривал додека тројцата живееле заедно во изнајмен стан во населбата Карпош. Парите што ги барал биле за кирија за станот, поправки на автомобил и други трошоци.
Откако случајот бил пријавен кај надлежните органи, пријавителот вчера во угостителски објект во Скопје му ги дал парите на таткото.
„Лицето е лишено од слобода веднаш откако од пријавителот примило 200 евра, кои претходно биле крим-технички обработени“,
велат од МВР.
Против 57-годишниот маж е поднесена пријава по член 258 од Кривичниот законик.