Целиот случај е обелоденет откако на 27 јуни, како што се вели во соопштението од Обвинителството, едно од девојчињата се охрабрило и го пријавило таткото во полиција
Татко во периодот од 2021 до 2023 година, во повеќе наврати во семејниот дом вршел полови дејствија врз неговите три ќерки, родени 2008, 2010 и 2014 година, кои во време на сторување на делата немале наполнето 14 години, информира Јавното обвинителство.
Целиот случај е обелоденет откако на 27 јуни, како што се вели во соопштението од Обвинителството, едно од девојчињата се охрабрило и го пријавило таткото во полиција.
Оттаму велат дека во Основното јавно обвинителство Прилеп е донесена наредба за спроведување истражна постапка против 36-годишен жител на Прилепско, за кого постои основано сомнение дека сторил продолжени кривични дела – силување на дете кое не наполнило 15 години од член 188 став 1, како и родосквернавење од член 194 став 2 во врска со став 1 од Кривичниот законик.
„Истрага е поведена и против мајката на децата, која е осомничена за кривично дело – запуштање и малтретирање на дете од член 201 став 1 од Кривичниот законик. Делото го сторила со грубо запоставување на својата должност за грижа и воспитување и ги запуштила своите ќерки, кои ѝ кажале дека таткото врши полови дејствија и обљуба врз нив, а таа ги убедувала дека е срамота да пријават и дека треба да ги почитуваат родителите. Со тоа допуштила децата жртви да живеат заедно со нивниот татко кој полово ги злоупотребувал и не презела никави мерки за нивна заштита“,
велат од Обвинителството.
За двајцата родители јавен обвинител достави предлог за определување мерка притвор. Иницирано е и соодветно згрижување на сите деца од семејството преку надлежните служби.