Вчера украинскиот медиум „Зеркало недели“ објави дека втората рунда преговори ќе се одржи на 2 март, но немаше официјална потврда за ова од ниту еден член на преговарачките тимови од двете страни
Мировните преговори меѓу Русија и Украина ќе продолжат вечерва, јави руската државна новинска агенција ТАСС.
Помошникот на украинскиот претседател за Си-ен-ен го потврдил тоа.
„Сега е официјално. Втората рунда преговори меѓу Украина и окупаторот ќе се одржи денеска“,
изјави тој.
Вчера украинскиот медиум „Зеркало недели“ објави дека втората рунда преговори ќе се одржи на 2 март, но немаше официјална потврда за ова од ниту еден член на преговарачките тимови од двете страни.
„Нашата делегација ќе биде подготвена да ги продолжи разговорите“,
изјави претходно портпаролот на Кремљ, Дмитриј Песков.
Тоа уследи по првата рунда разговори на руско-белоруската граница, на која не беше постигнато никакво решение.
Помошникот на претседателот Владимир Путин, Владимир Медински, повторно ќе биде главен преговарач за Русија.
„Мислам дека работите ќе останат исти. Ништо нема да се промени. Ние ќе се држиме до нашиот став. Истите луѓе се вклучени“,
изјави советникот на Путин, Олексиј Арестович.
Сè уште нема информации каде би можеле да се одржат разговорите.
Украинскиот претседател Володимир Зеленски вчера децидно кажа, а утринава и повтори, дека Русија мора да престане да ги бомбардира украинските градови пред да продолжат преговорите.
Рускиот претседател Владимир Путин преку соопштение од Кремљ повтори дека владата во Киев мора да ги признае самопрогласените народни републики Луганск и Донецк како услов за завршување на „воената операција“ во Украина.
Киев, исто така, мора да го признае суверенитетот на Русија над Крим и да се обврзе дополнително да се откаже од нуклеарното оружје во иднина, соопшти Кремљ.
Покрај тоа, Украина мора да биде демилитаризирана и да усвои неутрален статус, нагласи Путин.