Во однос на тоа ако денеска има реакција од неговите коалициски колеги, Таравари рече дека зависно од тоа ќе видат и тие како понатаму да продолжат
Лидерот на дел од Алијанса за Албанците, Арбен Таравари, вели дека неговото крило е отворено за соработка и додаде дека кој сака е добредојден да им се придружи.
Таравари денеска, одговарајќи на новинарско прашање дали е можно повторно спојување со лидерот на другото крило од Алијанса за Албанците, Зијадин Села, рече:
„Јас кажав дека нашата куќа, нашата фамилија е голема, за сите вратите се отворени, така што, кој сака нека повели, е добредојден“.
На ново прашање дали тоа се однесува и на Села, Таравари рече:
„Ако сака, добредојден е, отворени се вратите“.
Тој додаде дека во неговото крило од партијата има околу 90 отсто и рече дека пред 10 дена им се припоил и градоначалникот на Врапчиште што претходно бил на другата страна.
Прашан какви се реакциите на партнерите од ВЛЕН по вчерашната одлука на неговата Алијанса за Албанците на локалните избори да оди со свои советнички листи, а да остане дел од коалицијата, Таравари рече дека ставот го има уште од август минатата година.
„Што повеќе кандидати има на советничките листи толку е подобро, граѓаните ќе имаат повеќе избор. Тоа е дефинитивен став за советничките листи. За градоначалници повторно сме отворени, пред сè со ВЛЕН да зборуваме“,
додаде тој.
Во однос на тоа ако денеска има реакција од неговите коалициски колеги, Таравари рече дека зависно од тоа ќе видат и тие како понатаму да продолжат.
Инаку, лидерот на Демократско движење, Изет Меџити, кој е дел од ВЛЕН рече дека денеска ќе има седница на коалицијата на која ќе се разговара за вчерашната одлука на Алијанса за Албанците на Таравари.
На состанокот, што во моментов се одржува во седиштето на коалицијата во Скопје, освен лидерите на Беса, Билал Касами, Изет Меџити на Демократското движење, и на Алтернатива, Зекири Ибраими, присуствуваат министри и пратениците од овие три партии, но и градоначалници и други функционери.
Дел од присутните на состанокот пред почетокот рекоа дека за заклучоците ќе треба да се почека официјалниот став на коалицијата.