За случајот со петгодишното девојче, кое почина од воспаление на мозокот, министерот за здравство вели дека не треба да се политизира бидејќи, како што кажа, деца со таква тешка патологија, за жал, умираат секаде во светот
Министерот за здравство Арбен Таравари сè уште не го добил извештајот на Државниот санитарен и здравствен инспекторат од извршениот вонреден инспекциски надзор во Клиниката за детски болести по смртта на петгодишното девојче, кое почина од воспаление на мозокот.
Таравари очекува денеска или утре да го добие извештајот, а во врска со обвинувањата на опозициската ДУИ за лошите состојби со здравствениот систем во државата, министерот вели дека тие се обидуваат на секаков начин да прикажат дека откако тие не се на власт сè е катастрофа.
Според министерот за здравство, и да била оваа владина гарнитура на власт една, две или три години, здравствениот систем повторно немало да може да се подобри преку ноќ или за неколку месеци.
Ова што се случува вели дека е последица на тоа што го наследиле, а конкретно за случајот со петгодишното девојче вели дека не треба да се политизира бидејќи, како што кажа, деца со таква тешка патологија, за жал, умираат секаде во светот.
„Не треба да се политизираат случаи каде што навистина било болно детето и навистина патологијата била тешка оти од менинго-енцефалити секаде во светот умираат деца, за жал. Се случува и кај нас. Директорот покажа и статистика за морталитетот на Клиниката, така што не е нешто спектакуларно како што прикажуваат, оти на некаков начин сакаат да го тргнат вниманието на јавноста од реалните проблеми, па еве како да го критикуваме Таравари или директорот на Детската клиника, па ќе кажеме дека починало некое дете. Таму каде што имаше феномени можеби на лекарски пропуст ние преземавме чекори. Најмногу се умира во болница, не починуваат луѓето дома. Значи сите тешки пациенти кои што имаат сериозни болести за жал таму е местото каде се лекуваат и, за жал, одредени луѓе починуваат“,
рече Таравари одговарајќи на новинарско прашања пред почетокот на настан на кој беа презентирани резултати за квалитетот на воздухот во училишта и градинки во пет општини во државава.
По неколкуте смртни случаи на деца за релативно краток период на Клиниката за детски болести – Скопје во изминатиот период, министерот за здравство Арбен Таравари вчера изјави дека директорот Реџеп Мемеди му испратил статистики од минатото кои покажуваат дека морталитетот на Клиниката оваа година споредбено со претходните е многу помал.
Демократската унија за интеграција денеска претпладне преку писмено соопштение побара од министерот за здравство Таравари да си поднесе оставка и да преземе одговорност за неколкуте трагични настани што се случија изминатиот период.
Демократската унија за интеграција (ДУИ) бара министерот за здравство Арбен Таравари да си поднесе оставка и да преземе одговорност за неколкуте трагични настани што се случија изминатиот период.
Според ДУИ, кај министерот за здравство има недостаток на посветеност и одговорност што е неприфатливо, особено кога здравјето и животот на децата се во опасност.
Инаку, за еден месец, на Детската клиника имаше три смртни случаи, а последно во низата беше смртта на петгодишно девојче кое на петти ноември починало на Детската клиника од воспаление на мозокот.
Девојчето, според информациите што ги објавуваат медиумите, претходно било хоспитализирано поради силна главоболка. Откако било примено на клиниката, прво било лекувано на Одделот за неврологија, но откако состојбата се влошила, било префрлено на Одделот за интензивна нега. Таму на девојчето му била направена и интубација, но, и покрај напорите на медицинскиот кадар, тие не успеале да го спасат детето кое развило менинго-енцефалит и пред два дена починало.
Претходно на клиниката почина и 14-месечното бебе, за што двајца доктори специјалисти од Детската клиника времено се отстранети од работа од установата додека за нив се води дисциплинска постапка согласно членот 192 од Законот за здравствена заштита.