Талибанците сакаат странските амбасади во Авганистан да продолжат да работат како и досега и тврдат дека нивните вработени не се во опасност, изјави за Би-би-си портпаролот на катарската политичка канцеларија на талибанците, Мохамед Сохаил Шахин.
„Прво, ние сакаме трансферот на власта да се случи во следните неколку дена. Второ, луѓето треба да му се вратат на вообичаениот секојдневен живот. Трето, оние што соработувале со администрацијата во Кабул или со странски сили не треба да се плашат од одмазда. Ние, исто така, сакаме сите амбасади да продолжат да работат како и досега“,
рече Шахин и повтори дека талибанците нема да им наштетат на дипломатите и на странските државјани.
Тој вели дека талибанците сакаат да избегнеме крвопролевање, уништување и оштетување на имотот на населението и дека не сакаат да создадат услови за разбојниците кои, како што нагласува, едвај чекаат изговор да почнат да ограбуваат луѓе.
Вели дека талибанските сили добиле јасни инструкции за влез во Кабул и дека се очекува мирно предавање на власта.
Шахин додаде дека сите преговарачи на талибанското политичко крило сѐ уште се во Доха и не се испратени во Авганистан да разговараат за условите за политичката транзиција.
„Лидерот на талибанското политичко крило Мула Абдул Гани Барадар ќе пристигне во Кабул со делегација преговарачи кога ќе дојде време за тоа, во зависност од тоа како ќе се развиваат настаните“,
рече Шахин.