Оваа информација е спротивна на првичните пофалби што СЗО ги упатуваше кон Пекинг за начинот на кој се справува со епидемијата
Снимки од онлајн-состанок на СЗО покажале дека Организацијата многу тешко добивала информации од Кина на почетокот на пандемијата од новиот коронавирус, објави агенцијата АП повикувајќи се на снимките во кои имала увид.
Оваа информација е спротивна на првичните пофалби што СЗО ги упатуваше кон Пекинг за начинот на кој се справува со епидемијата.
Снимките на кои се повикува АП се од видеосредба на 6 јануари на која претставници на СЗО се жалат дека Пекинг не ги споделува со светот потребните податоци за проценка на опасноста од новиот вирус.
„Работиме со многу малку информации. Тоа воопшто не е доволно за да подготвиме план“,
вели Марија Ван Керхове, епидемиолог и технички водител на СЗО во текот на пандемијата на ковид-19.
Шефот на СЗО во Кина, Гауден Галеа, на една од снимките истакнува дека од Кина добиваат информации 15 минути пред тие да се објават на ЦЦТВ.
Портпаролот на кинеското Министерство за надворешни работи, Џао Лиџијан ги отфрли наводите АП, нагласувајќи дека извештајот на не е вистинит.
Кина на 20 јануари призна дека коронавирусот е заразен, а на 30 јануари СЗО прогласи пандемија.
Извештајот се појавува по зголеменото незадоволство на меѓународната заедница поради кинеската реакција на коронавирусот и почетокот на независната истрага за потеклото на вирусот, од кој досега се заразени над шест милиони луѓе низ светот, а починаа повеќе од 37 000 лица.
Здравствената комисија на градот Вухан, кој е жариштето на епидемијата, објави дека го завршила тестирањето на 11 милиони жители, при што не се регистрирани нови случаи на ковид-19.
Регистрирани се 300 асимптоматски инфекции, кои во Кина не се сметаат како потврдени случаи на ковид-19.
Кина досега пријави 83 022 заболени и 4634 починати од ковид-19. САД сметаат дека земјата ги крие вистинските бројки и поради тоа упати критики и до СЗО дека застанала на страната на Пекинг.