Земјите со високи и високи средни приходи сочинуваат 53% од светската популација, но примиле 83% од светските вакцини, додека земјите со ниски и пониски средни приходи сочинуваат 47 проценти од светската популација, но примиле само 17 проценти од светските вакцини
Случаите на зараза и смртните случаи како последица од коронавирусот се намалуваат во повеќето региони, вклучително и во најпогодените области на Америка и Европа, но шокантната глобална разлика во пристапот до вакцините е еден од најголемите ризици за ставање крај на пандемијата, изјави директорот на Светската здравствена организација Тедрос Гебрејезус.
„Сега гледаме пад на бројот на случаи со ковид-19 и смртните случаи во повеќето региони, вклучително и во Америка и Европа“,
рече Гебрејезус на веб-семинар посветен на пандемијата.
Сепак, тој изјави дека бројот е сè уште „неприфатливо голем“, со повеќе од 5,4 милиони регистрирани случаи и скоро 90 000 смртни случаи минатата недела.
СЗО потврди дека во светот се пријавени околу 158 милиони случаи и 3,3 милиони смртни случаи. Досега се дадени повеќе од 1,2 милијарда дози вакцини.
„Инфекциите и смртните случаи се уште растат во североисточна Азија. Има земји во секој регион со растечки тренд“,
рече Гебрејезус.
Според него, на Индија очајно ѝ е потребна опрема и лекови.
„Ширењето на варијанти на вирусот, зголемено социјално мешање, ублажување на социјалните мерки и нееднаква вакцинација – се се тоа двигатели на преносот“,
рече Гебрејезус.
Вакцините ги намалуваат сериозните болести и смртните случаи во земјите кои имаат доволно среќа да ги имаат во доволни количини, изјави шефот на СЗО.
„Но, шокантната глобална разлика во пристапот до вакцините останува еден од најголемите ризици за ставање крај на пандемијата“,
истакна тој.
Земјите со високи и високо-средни приходи сочинуваат 53% од светската популација, но примиле 83% од светските вакцини.
Спротивно на тоа, земјите со ниски и пониски средни приходи сочинуваат 47 проценти од светската популација, но примиле само 17 проценти од светските вакцини, рече Гебрејезус.