Светската здравствена организација (СЗО) предупредува дека вакцините против ковид-19 не се подеднакво дистрибуирани низ земјите во светот и оцени дека тоа може да доведе до катастрофален морален неуспех.
Генералниот директор на СЗО, Тедрос Аданом Гебрејесус, рече дека е шокантно колку малку е направено за дистрибуцијата на вакцините да биде фер.
„Земјите што сега вакцинираат помлади, поздрави луѓе со помал ризик од заболување, тоа го прават по цена на животот на здравствените работници, старите лица и другите ризични групи во други земји“,
вели Гебрејесус.
Тој додаде дека нееднаквата дистрибуција на вакцините, покрај моралниот гнев што може да го предизвика, е лоша стратегија од економска и епидемиолошка гледна точка.
Тедрос објасни дека колку повеќе вирусот се пренесува толку е поголема веројатноста дека ќе се појават нови варијанти, против кои вакцините потешко ќе бидат ефикасни.
Од оваа гледна точка, тој смета дека богатите земји си даваат лажно чувство на безбедност.
„Ако не ја завршиме оваа пандемија што е можно побрзо, таа може да се задржи со години“,
предупреди тој.
До денеска дистрибуирани се повеќе од 455 милиони дози вакцина против ковид-19 на вкупно 162 територии.
Еден начин да се добијат вакцини во сиромашните земји е преку Ковакс, глобален механизам кој се обидува да обезбеди 92 од најзагрозените економии да имаат пристап до овие имунизација, чии трошоци ќе бидат покриени од донатори.
Ковакс дистрибуираше повеќе од 31 милион дози во 57 земји и планира да дистрибуира доволно вакцини за да достигне до 27 отсто од населението во тие 92 земји.
Повеќе од 2,7 милиони потврдени смртни случаи од коронавирус се пријавени ширум светот од почетокот на пандемијата, покажуваат податоците на Универзитетот „Џон Хопкинс“ во САД.