Просечната глобална температура на 3 јули достигнала ново највисоко ниво, односно 17 Целзиусови степени. Оваа температура, според експерти од областа, е највисоката просечна температура што е измерена од почетокот на сателитскиот мониторинг од 1979 година, а најверојатно е и највисоката од крајот на 19 век, од кога се прават инструментални мерења
Понеделникот, 3 јули 2023 година, е забележан како најтоплиот ден на планетата Земја во историјата на мерењата на температурата. Просечната глобална температура на 3 јули достигнала ново највисоко ниво, односно 17 Целзиусови степени, надминувајќи го рекордот од 16,9 степени измерени во август 2016 година.
Оваа температура, како што објави Би-би-си, цитирајќи експерти од областа, е највисоката просечна температура што е измерена од почетокот на сателитскиот мониторинг од 1979 година, а најверојатно е и највисоката од крајот на 19 век, од кога се прават инструментални мерења на температурата.
Екстремната топлина се должи на комбинацијата на временскиот феномен Ел Нињо и тековните емисии на јаглерод диоксид предизвикани од човекот. Експертите веруваат дека во наредните месеци просечната температура ќе достигне нови рекорди поради јакнењето на Ел Нињо.
„Просечната глобална температура на површинскиот воздух достигнува 17 Целзиусови степени по првпат откако имаме достапни доверливи податоци и е значајна пресвртница во нашиот свет кој се загрева. Но, сега кога започнува потоплата фаза на Ел Нињо, можеме да очекуваме многу повеќе дневни, месечни и годишни рекорди кои ќе се соборат во следните година и пол“,
вели климатскиот истражувач Леон Симонс, кого го цитира Би-би-си.
Минатиот месец беше потврден и како најтоплиот јуни на глобалниот рекорд.