Од Синдикатот најавуваат дека ќе ги преземе сите законски расположливи мерки против раководството, вклучувајќи кривични пријави и пријави до Државниот инспекторат за труд. Притоа, тие додаваат дека ќе водат сметка да не бидат доведени во прашање положбата, здравјето на вработените и здравјето на граѓаните на Скопје
Синдикатот на работниците од угостителството, комунално-станбеното стопанство, занаетчиството и заштитните друштва (СУТКОЗ) заедно со вработените во јавното претпријатие „Комунална хигиена“ најавија дека ќе преземат законски мерки против раководството на претпријатието поради доцнење на платите на вработените и лоша состојба со возниот парк.
Ова доаѓа по состанокот на Извршниот одбор на синдикалната организација на СУТКОЗ при ЈП „Комунална хигиена“ одржан вчера, на 21 октомври. На состанокот биле повикани директорот и Управниот одбор на претпријатието, но директорот не присуствувал.
Од СУТКОЗ посочуваат дека платите на вработените се исплаќаат со задоцнување веќе неколку месеци, иако, според нивните сознанија, парични средства од наплатата на сметките редовно се префрлаат на сметката на претпријатието.
И покрај доцнењето на платата за месец септември, синдикатот нагласува дека вработените редовно ги извршуваат своите работни задачи. Сепак, тие се соочуваат со сериозен проблем – недостиг на камиони за собирање смет, при што голем дел од постоечките возила не се во возна состојба поради недостаток на резервни делови.
„Вината не е кај вработените во претпријатието, кои вложуваат максимални напори да се собере сметот, туку кај раководството на претпријатието“,
се наведува во соопштението на СУТКОЗ.
Од Синдикатот најавуваат дека ќе ги преземе сите законски расположиви мерки против раководството, вклучувајќи кривични пријави и пријави до Државниот инспекторат за труд. Притоа, тие додаваат дека ќе водат сметка да не се доведе во прашање положбата, здравјето на вработените и здравјето на граѓаните на Скопје.
Вчера, од ЈП „Комунална хигиена – Скопје“ излегоа со соопштение во кое рекоа дека нивните вработени испорачуваат основни услуги за градот, но како претпријатие се постојано саботирани од, како што наведуваат, луѓе од власта.
Од јавното претпријатие велат дека се загрижени бидејќи, како што тврдат, во тек биле напори за организирање и спроведување протести поради доцнењето на платите на вработените.
Од скопски „Комуналец“, пак, велат дека платите на вработените ги исплаќаат навреме со неколкудневно задоцнување, а како причина за тоа го наведуваат долгот што, според нив, кон претпријатието го има Министерството за здравство, кој изнесува пет милиони евра.
Поради овој финансиски проблем, кој, како што велат од КХС, е децениски, претпријатието во последните 30 години работи со долгови
Од Министерството за здравство вчера во реакција на „Комунална хигиена“ рекоа дека немаат никаква обврска ниту долг кон јавното претпријатие.
Во врска со проблемот со собирањето и транспортирањето на комуналниот отпад на територијата на Град Скопје, вчера Владата ги задолжи надлежните инспекторати заедно со Министерството за внатрешни работи (МВР) да почнат координиран вонреден инспекциски надзор за да ја утврдат состојбата со комуналниот отпад, а во насока на преземање соодветни мерки и активности.