Ова е прв избор за второстепен суд спроведен врз основа на методологијата изработена согласно новиот Закон за Судски совет
Судскиот совет денеска ги избра Габриела Гајдова, Александра Ристевска, Весна Димишкова и Осман Шабани за судии од кривична област во Апелацискиот суд-Скопје.
Со тоа Судскиот совет го екипира Апелациониот суд Скопје со вкупно осум нови судии откако претходно на денешната седница избра и четворица судии од граѓанската област – судиите Александар Шопов, Ирена Костадинова Ангелова, Наталија Донева и Илир Сулејмани.
Ова е прв избор за второстепен суд спроведен врз основа на методологијата изработена согласно новиот Закон за Судски совет.
Прворангираниот судија на конечната ранг листа за судии од кривична област, судијата Лазар Нанев, од Основниот суд Кавадарци не беше избран за апелационен судија бидејќи доби 4 гласа „за” и 8 гласа „против” од членовите на Судскиот совет.
Весна Дамева рече дека нема да гласа за овој судија, иако е прворангиран на листата бидејќи во изминатиот период се нашол во многу ситуации кои не биле докрај расчистени.
Лорета Георгиева рече дека не треба да се заборави пресумпцијата на невиност бидејќи за ништо од наводите против овој судија нема крајна одлука.
„Ќе го поддржам судијата Нанев за неговите лични и професионални квалитети“,
рече Георгиева.
За судија на Апелациониот суд-Скопје, Советот ја избра второрангираната, судијката Габриела Гајдова, од Основниот суд Велес, која доби 12 гласа „за”.
Судскиот совет ја избра шесторангираната судијка Александра Ристевска од Кривичниот суд Скопје со 9 гласа „за” и 2 „против”.
Судијката Весна Димишкова, од Кривичниот суд Скопје, како 11-рангирана доби 11 гласа „за” и еден „против” и беше избрана за судија во Апелациониот суд Скопје.
Судскиот совет го избра судијата Осман Шабани од Кривичниот суд Скопје, кој како 13. рангиран на листата доби 11 гласа „за” и еден „против”.
За преостанатите кандидати од конечната ранг-листа не се гласаше бидејќи потребниот број од четворица судии веќе ја доби довербата на членовите од Судскиот совет.
На огласот за осум позиции во Апелацискиот суд имало вкупно 45 кандидати, од кои 21 кандидат за четири судии за граѓанска област и 24 кандидати за четири судии од кривична област.
Претседателот на Судскиот совет, Сашко Георгиев, нагласи дека ова е прво оценување согласно новата методологија појаснувајќи дека процесот е сочинет од два дела при што едниот дел го спроведува Судскиот совет по однос на постигнатите резултати како квантитет по број на решени и укинати предмети, а другиот го спроведуваат самите судови.
Долгиот временски периодот потребен на Судскиот совет за избор на судии во повисок суд беше посочен и во Извештајот на Европската комисија.