Сите деветмина присутни членови на Советот одлучија да заседаваат и денеска и утре, а причина беше точката 3, односно расправа по претставки и поплаки поднесени од граѓаните и правните лица за работата на судиите, претседателите на судовите и судовите, кои ги има над 60
Имајќи го предвид големиот број претставки, расправата по пресудата на Управниот суд за судијката Елизабета Дуковска најверојатно ќе биде поместена за утре
Судскиот совет денеска ја почна 534. седница, прва во новата 2026 година, а според дневниот ред што го изгласаа неговите членови таа ќе трае два дена. Всушност, станува збор за седницата што првично требаше да се одржи на 24 декември лани, но поради немање кворум таа беше одложена за денеска. Инаку, една од точките на дневен ред на оваа седница е и расправа по пресудата на Управниот суд со која судијката Елизабета Дуковска стана првата „одјавена“ уставна судијка.
За разлика од 24 декември, кога во салата за седници на Судскиот совет се собраа само шестмина членови, додека останатите беа отсутни поради користење годишен одмор или боледување, денеска претседателот на Советот, Александар Камбовски, констатира дека се исполнети условите за работа со присутни девет членови на ова тело.
Денеска во Советот, покрај претседателот Камбовски, беа присутни членот и негов заменик Аритон Ала, како и нивните колеги Исамедин Лимани, Антоанета Димовска, Ивица Николовски, Данка Ристова, Ханиф Зендели, Џебета Бектовиќ и Павлина Црвенковска. На седницата дојде и претседателот на Врховниот суд, Африм Фидани, кој е член по функција и може да расправа и да дава сугестии по точките, но нема право на глас при одлучувањето.
Поради боледување, отсутна беше само членката на Советот, Тања Чачарова-Илиевска, како и министерот за правда Игор Филков, кој како и претседателот на Врховен е член по функција.
Инаку, Судскиот совет извесен период работи во намален состав, откако на Весна Дамева, Миљазим Мустафа и на Селим Адеми им истекоа мандатите.
Сите деветмина присутни членови на Советот одлучија да заседаваат и денеска и утре, а причина беше точката 3, односно расправа по претставки и поплаки поднесени од граѓаните и правните лица за работата на судиите, претседателите на судовите и судовите.
Имено, членовите на Советот имаа пријавено над 60 претставки за расправа.
Предлогот седницата да трае два дена го даде членот Ивица Николовски. Тој предложи точката 3 да се помести за утре, а денеска да се расправа по другите точки од дневниот ред.
„Г. претседателе (Александар Камбовски н.з.) видно од вашето излагање на денешниот дневен ред може сите да констатираме дека под точка 3 на дневен ред се преставки. Се работи за обемен број претставки, па мојот предлог би бил по оваа точка ние да имаме продолжена седница, односно денеска да работиме по сите останати точки, а под точката 3 оваа седница да продолжи утре, исклучиво произнесување по претставките кои ни се во работа, сè со цел да можеме со една поголема концентрација и пообјективно да се произнесеме по истите. Голем е бројот на претставките коишто секој од нас ги има пријавено“,
рече Николовски.
Неговиот колега и заменик-претседател на Советот, Артон Ала, се согласи да има продолжена седница, но да се оди по ред со точките.
„Да одиме по ред со точките, до кај ќе стигнеме денеска, па ќе продолжиме утре. Тоа е мој предлог“,
рече Ала.
Така беше и усвоен дневниот ред, кој беше дополнет со уште неколку точки во врска со изборот на членови на Судскиот совет, а по предлог на претседателот Александар Камбовски.
„Тоа да биде извештајот за спроведено вонредно оценување кандидати за членови на Судскиот совет. Исто така, нова точка – разрешување судии и поротници. Нова точка, избор на член на Советот од редот на судиите. Во оваа точка Советот треба да донесе одлука за ден на спроведување на изборот, решение за формирање комисија за избор на член Советот од редот на судиите и да се заклучи судскиот изборен именик. Тие се тие точки“,
кажа Камбовски.
Имајќи го предвид големиот број претставки, расправата по пресудата на Управниот суд за судијката Елизабета Дуковска најверојатно ќе биде поместена за утре.
Станува збор за пресудата на Управниот суд донесена на 15 мај минатата година, со која беше поништена одлуката на Собранието од 10 април 2023 година за избор на Елизабета Дуковска за судијка во Уставниот суд.
За потсетување, Дуковска беше избрана за уставна судијка од Собранието, како предлог на Судскиот совет. Шест месеци подоцна стигна тужба до Управниот суд од судијката Антоанета Димовска. Таа се жалеше дека кога Судскиот совет ја утврди Дуковска како предлог за уставен судија, инаку со 11 гласа „за“ од можни 13, не се изјаснил и за другите двајца кандидати, меѓу кои и Димовска.
Дуковска повеќе од половина година не е уставна судијка, туку е делителка на правда во Апелацискиот суд Скопје, од каде што дојде, а нејзиниот случај сè уште ја бранува јавноста, делумно и поради сомнежот дека пресудата е пишувана „однадвор“.
Во гостување во емисијата „360 степени“, на 9 јуни минатата година година, Дуковска даде објаснување и зошто се сомнева дека пресудата е пишувана во АКМИС-системот.
„Во АКМИС-системот пресуда кога се куца… Најгоре на образецот, бидејќи е пресуда, секогаш стои во името на граѓаните на Северна Македонија. Оваа пресуда не содржи такво нешто, заради што судиите веднаш донеле решение за исправка“,
кажа тогаш Дуковска.
За судијката е спорно и тоа што во пресудата на Управниот суд не се спори актот на Собранието, кое ја изгласа, туку го проблематизира начинот на кој Судскиот совет ја утврдил за кандидатка.
Тоа уште летоска отвори повеќе дилеми, на пример – како сега Судскиот совет ќе бира кандидат за испразнетото место во Уставен?
Претседателот на Судскиот совет, Александар Камбовски, во своите јавни настапи зборуваше дека е оптимист оти ќе се реши прашањето со празното столче во Уставен. Неговите очекувања беа дека тоа ќе биде направено до крајот на минатата 2025 г. но седницата на која требаше да се расправа за ова прашања на 24 декември беше одложена, а на последниот ден од старата година беше закажан новиот термин за нејзино одржување, односно 12 јануари 2026 г.
Инаку, барањето случајот да се расчисти до крај се чини дека за Дуковска не е толку заради функцијата колку што е прашање на принцип.
На прашање на „360 степени“ во случај да се оди со повторување на постапката за неа, дали повторно би ја изоделе цела таа постапка или втората варијанта, доколку се распише нов јавен повик, дали би се кандидирале повторно – таа рече дека засега не може да каже.
Повик Судскиот совет итно да предложи кандидат за Уставниот суд на крајот на минатата година, од прес-конференција упати и претседателот на Уставен, Дарко Костадиновски. Тој упати повик и до Собранието да избере уставни судии, а политичарите да покажат повисоко ниво на уставно-правна култура и да се воздржат од етикети и поделби, со што ќе покажат реална, а не декларативна посветеност на владеењето на правото.