Судот во Будимпешта одбил да го екстрадира поранешниот премиер Никола Груевски, јавуваат унгарските медиуми. Судот заклучил дека не се исполнети условите за екстрадиција.
Се уште останува нејасно за кое барање за екстрадиција одлучуваше судот во Будимпешта – дали за издржување на казната затвор во случајот „Тенк“ или за најновото барање поврзано со организацијата на настаните во Собранието од 27 април 2017 година.
Одлуката на судот во Будимпешта беше донесена околу еден час откако Никола Груевски беше спроведен со полициска придружба.
Според видеото кое го објави унгарскиот портал hvg.hu и при спроведувањето и за време на рочиштето, Груевски носи безбол капа, темни наочари, а видливо е и дека рацете, кои ги држи постојано споени пред него, се покриени со сако. Вообичаено, тоа го прават осомничени или обвинети лица кога на рацете имаат лисици, а тоа не сакаат да биде јавно забележано.