Судијка од Основниот граѓански суд Скопје, која се вратила од патување во Франција, е во двенеделна домашна изолација поради препораките на македонските власти за заштита од коронавирусот. Од судот за „360 степени“ ја потврдија информацијата.
„Судијката е вратена од патување и, согласно препораките на Владата, е во самоизолација. Таа не е заболена од коронавирус. Инаку, судот ги презема сите потребни мерки по препораките на Владата за заштита на вработените од коронавирусот“,
вели за „360 степени“ портпаролката на судот, Сања Томиќ-Велкоски.
Како што ни потврдија од Граѓанскиот суд, но и од Апелацискиот и од Врховниот суд, денеска се врши дезинфекција на сите простории во судовите, но повод за тоа не била судијката која е во изолација, туку препораките на Владата.
Граѓанин што денеска бил на рочиште во Граѓанскиот суд за „360 степени“ вели дека судијата што го води неговиот предмет предложил рочиштето да се одложи и да се одржи по две недели.
„Судијата предложи, а ние како странки прифативме. Се согласивме со судијата дека тоа е и за наша заштита како странки, но и за заштита на вработените во судот“,
вели тој.
Инаку, денеска беше одложено и рочиштето за предметот ТНТ на Специјалното јавно обвинителство, исто така, заради превенција од вирусот.