Судијката Снежана Марковска констатира дека не се исполнети законските услови за водење на постапката, со оглед на предлогот упатен до Коцевски, по кој е потребно да одлучи јавниот обвинител на РСМ
Судењето против поранешниот директор на Клиниката за онкологија, Никола Васев, и уште двајца онколози обвинети за несовесно лекување пациенти, е одложено за 8 октомври. Причина за одложувањето е барањето на одбраната на Васев до државниот јавен обвинител Љупчо Коцевски да го преземе предметот или да го делегира на друго јавно обвинителство.
Судијката Снежана Марковска констатира дека не се исполнети законските услови за водење на постапката, со оглед на предлогот упатен до Коцевски, по кој е потребно да одлучи јавниот обвинител на РСМ.
„Со оглед на предлогот упатен до државниот јавен обвинител Љупчо Коцевски со кој се бара преземање на кривично гонење, по кој поднесок е потребно да одлучи јавниот обвинител на РСМ, судот констатира дека не се исполнети законските услови за водење на постапката од кои причини главната расправа се одложува за 8 октомври“,
изјави судијката Марковска.
Барањето за делегирање на надлежност од Основното јавно обвинителство Скопје на државниот јавен обвинител го достави адвокатот Спиро Ристовски, еден од новите бранители на Васев.
Јавната обвинителка Ана Гоговска-Јакимовска, побара одложување и посочи дека не може да се произнесе по ова барање и мора да го достави до надлежната институција.
Пред почетокот на рочиштето, бранителите на првообвинетиот Нино Васев, адвокатите Мартин Митровски и Никола Ставрев го повлекле полномошното, а нови бранители се Дељо Кадиев и Спиро Ристовски.
Денешното рочиште требаше да продолжи со сослушување на сведоци предложени од Обвинителството, од кои дел беа повикани во Основниот кривичен суд Скопје.
Во овој предмет, Никола Васев заедно со онколозите Симонида Црвенкова и Драган Јакимовски се обвинети за продолжени тешки дела против здравјето на луѓето и несовесно лекување. Обвинението ги товари лекарите дека кај 29 пациенти биле применети неподобни терапии, со отстапувања во дозирањето и без соодветна проценка на здравствената состојба.
Постапката првично се водеше и против онкологот Мери Пешевска, која призна вина пред судот и беше осудена на две години затвор, но казната нема да се изврши доколку во наредните пет години Пешевска не стори друго кривично дело.
На рочиштето на 5 септември, поранешниот директор Нино Васев се изјасни дека не се чувствува виновен за кривичните дела што му се ставаат на товар.
Васев пред Судот, исто така, посочи дека има 35 години работно искуство со 1 000 пациенти годишно, членство во сите европски институции за изработување протоколи за кои го обвинуваат, повеќе од десет авторски трудови со најголем импакт фактор, единствен од Македонија што има авторски труд во „Ланест“, токму за употреба на имунотерапија.
Покрај овој случај, против поранешниот директор Васев и поранешниот економски директор на Клиниката е поднесено уште едно обвинение за злоупотреба на службена положба и проневера, со штета од над 2,2 милијарди денари на државниот буџет.