Јаневска посочи на новите модели на полагање на матурата, што ќе биде олеснување за учениците од стручните училишта кои досега за матура требало да се подготват за материјал кој не го изучувале во текот на четири години
Во однос на тоа дали ќе се зголеми дневниот износ на студентскиот оброк или, пак, да остане истиот од 140 денари, а да се зголеми опсегот на студенти што ќе ја користат оваа субвенција, министерката Јаневска одговори дека се прават анализи
На сметката на Јавното сообраќајно претпријатие „Скопје“ денеска треба да бидат уплатени 120 милиони денари за бесплатниот студентски превоз во Скопје, најави министерката за образование и наука Весна Јаневска.
Средствата се реалоцирани од буџетот на Министерството за образование и наука, а одлуката беше донесена на владина седница.
Јаневска денеска беше на средба со претставници на Националното студентско тело, Сојузот на средношколци и Форумот за образовни промени, со кои разговараше за заедничките приоритети во 2025 година.
„Состанокот беше плоден, повеќето нивни барања ќе бидат во најбрз можен рок исполнети, некои ќе бидат малку одложени, но продолжуваме заеднички да работиме. Разговаравме за зголемена контрола или мониторинг во високото образование, зборувавме за повеќе електронски учебници односно студентите побараа повеќе учебници да бидат поставени на платформа во ПДФ-формат“,
рече Јаневска.
Приоритетите во високото образование, посочи таа, ќе бидат во насока и на подобрување и на квалитетот на образование, за што ќе се ревидираат студиските програми кои ќе бидат модеренизирани според потребите на студентите, но и според потребите на пазарот на труд.
На средбата било разговарано и за студентското организирање и за двата закона – за студентски и за ученички стандард кои, како што рече Јаневска, се подготвени и годинава треба да бидат донесени.
Берин Мухамед од Сојузот на средношколците изјави дека заедно со студентите излегле со два нови предлог-закона – за средношколско и за студентско организирање.
„На средбата зборувавме и за кариерното советување, кое ни е потребно и во средното и во високото образование, зборувавме за државната матура, како и за дигитализација и да биде дадена можност учебниците да ги имаме и во ПДФ-формат и да може да ги даунлодираме“,
изјави Мухамед.
Јаневска посочи на новите модели на полагање на матурата, што ќе биде олеснување за учениците од стручните училишта кои досега за матура требало да се подготват за материјал кој не го изучувале во текот на четири гидини.
„Во средните стручни училишта ќе полгаат средно стручна државна матура соодветно на општообразовните предмети коишто ги слушаат по наставен план и програма, и тој е помал од оние во гимназиските. Гимназиските ќе си полагаат гимназиска државна матура и на тој начин и едните и другите ќе можат, доколку сакаат, да се запишат во странство. Оние што ќе полагаат средно стручна матура ќе можат без приемен испит да се запишат на сродните нивни факултети. На пример, од електро-машинско училиште – и на Машински и на Електро. Но, ако сакаат да се запишат на Медицински, на Филозофски или на друг таков факултет, тие ќе треба да полагаат државна гимназиска матура. Одлуката е нивна“,
изјави Јаневска.
Претседавачот со Националното студентско тело, Александар Николовски, изјави дека во делот на студентскиот стандард разговарале за зголемување на опсегот на бесплатен јавен превоз за сите студенти, покрај од државните, и од приватните универзитети, како и во другите универзитетски градови.
Во однос на тоа дали ќе се зголеми дневниот износ на студентскиот оброк или, пак, да остане истиот од 140 денари, а да се зголеми опсегот на студенти што ќе ја користат оваа субвенција, министерката Јаневска одговори дека се прават анализи.
„Во моментов во Министертсвото се прават анализите – доколку се прошири опсегот на студентскиот оброк, колку тоа реално би чинело. Студентите во моментов бараат проширување на опсегот, што значи дека дел од студентите кои се вклучени на пазарот на трудот по некакви минимални заработки, дека би требало да добијат студентски оброк. Во МОН има големо расположение и волја тоа и да се оствари. Мислам дека до крајот на овој месец или во февруари ќе ги имаме и тие анализи и ќе седнеме да се договориме дефинитивно за тоа. Но, нека биде тоа и од следната година, тие секако ќе ги добијат тие средства кои се предвидени за нив“,
рече Јаневска.