Едно 11-годишно дете и неговиот седум години постар брат И.У. се жртвите во вчерашната сообраќајна незгода во Охрид, кога возач на „бе-ем-ве“ од струшко Лабуништа удрил во двајцата пешаци. Според порталот Охрид 1, помалиот брат бил примен во болница „Св. Еразмо“ во Охрид, со скршеници на ногата и потрес на мозокот. Детето било во стабилна состојба и потоа било префрлено во Скопје.
Со потешки повреди, според порталот, минал постариот брат кој е во животна опасност. Тој бил веднаш префрлен на неврохируршката клиника во Скопје, но на инсистирање на родителите лекувањето веројатно ќе продолжи во една приватна болница.
За настанот што се случил вчера, МВР информираше претпладнево. Во нивното соопштение нема многу детали за состојбата на повредените ниту, пак, се објаснува како дошло до несреќата.
„На 24.12.2020 во 18:25 часот во Охрид на булевар „Железничка“ во Охрид, Е.Н. (45) од село Лабуништа, Струшко, управувајќи патничко моторно возило „бе-ем-ве“ со струшки регистарски ознаки, удрил во И.У. (18) и малолетник од Охрид. Во незгодата со тешки телесни повреди се здобил И.У. кој е пренесен во Комплекс клиники ‘Мајка Тереза’ во Скопје. На малолетникот му е укажана лекарска помош во болницата ‘Св. Еразмо’ во Охрид. За настанот е известен јавен обвинител и извршен е увид на местото на настанот“,
соопштија од МВР.
За настанот реагираше и градоначалникот на Охрид, Константин Георгиевски.
„Ова е ужасна вест. Немам зборови да ја опишам тагата и болката која ја чувствувам. Се молам двете братчињата да се изборат. Целата Општина Охрид и јас лично стоиме на располагање да помогнеме за сѐ што е потребно на семејството на братчињата во овие тешки мигови. Господ нека ги чува“
напиша градоначалникот на Охрид, Константин Георгиевски, на својот фејсбук-профил