Тоа е основното сценарио во „Скопје 83“, долгометражна игра во стилот на акција во прво лице, чија демо-верзија може да се најде на најголемите светски продавници за компјутерски игри како „Стим“
Играта се изработува во стан во скопски Аеродром. Дизајнерите одбрале и вирутелното, како и вистинското Скопје, да има архитектура во бруталистички стил, а превземени се и дел од историските градби
Ако сценографијата во оваа компјутерска игра ве потсетува на платото пред комплексот факултети на Бит Пазар… или, пак, овој дел многу наликува на Старата скопска чаршија… не сте заблуда. Ова старо-ново Скопје се создава во мал стан во скопски Аеродром. Го конструираат млади ентузијасти кои се обединиле во тим наречен „DARK-1“.
Приказната за сега веќе професионалната компанија за развој на видео-игри, започнала пред повеќе од десет години. Иако биле мал тим, имале големи амбиции.
„Во текот на тие години ние работевме на тоа да станеме подобри гејм девелоперс колку што може повеќе и конечно во 2017 година да решиме дека време е сами да почнеме да правиме игри. Оттогаш наваму имаме издадено една игра која се вика „Odium to the core“, која е достапна на мобилни уреди, Xbox и Нинтендо свич“,
изјави Трајковски.
По првичниот успех со играта наменета за мобилни уреди, тимот оди чекор понатаму. Започнува со планови за правење игра за компјутер наменета за широки маси. А називот на играта звучи познато оти го носи името на главниот град на земјава – „Скопје 83“.
Играта спаѓа во научно-фантастичниот жанр. Македонската метропола е претставена како дистописко општество под целосна опсада од мутанти и вонземјани, во која се препознатливи ретро елементи – од градби до возила.
„Ваша цел како играч е да се обидете како да спречите градот да биде уништен во рок од одредено време. Во моментов е седум дена, но во моментов се работи може и да се смени. Ваша цел е да ја спречите нуклеарката да се направи и цело време почнувате од почеток, значи почнувате од Калето и се шетате низ целиот град пробувајќи да научите како да се спречи оваа катастрофа“,
рече Трајковски.
Играта е се уште во фаза на изработка, но нејзината демо-верзија веќе е објавена на популарната платформа за видео-игри „Steam“ и бележи солиден број симнувања.
За изгледот на моделите и фигурите во играта е задолжен Симон Стојановски – директор на уметност и моделер. Како една од главните инспирации за него кои се пресликани во изгледот на играта се бруталистичките згради кои се дел од архитектонскиот декор на градот – од студентскиот дом Гоце Делчев, до Поштата и универзитетот Свети Кирил и Методиј.
„Брутализмот дури беше и првичната идеја, сакавме да направиме бруталистички град. Не се само од Скопје инспирирани градбите, ги земавме градбите од цел свет, нормално ги имаме нашите најважни бруталистички згради, ги има сите, ако не и плус некои измислени, ама да, брутализмот ни беше водечка архитектска насока“,
вели Стојановски.
Во текот на играта, секој играч има можност да го „истражи“ Скопје од Карпош 1 до Аеродром, од Железара до Водно.
Од каде инспирација токму македонската метропола да се претстави на картата на гејминг светот за вљубениците во видео-игрите кои сочинуваат значителен процент во светски рамки?
„Се случи во 2019 г. Симон, мојот колега влезе во канцеларијата радосен дека му текнало идеја за игра. Почна да раскажува, да е бруталистички град, да можеш цел град да го шеташ, да има многу непријатели и да се бориш со нив. Јас седев и го слушав и си реков па чекај малку, ако е бруталистички град, зошто не Скопје? Тука живееме, треба да го претставиме нашиот град и така од тоа мислам сите се согласивме веднаш и оттаму многу ни е драго што ја направивме таа одлука, Скопје да е центарот на играта“,
изјави Зарев.
Секој од вработените има своја улога во создавачкиот процес, а кога има тимска работа и хемија, соработката оди многу полесно. Кога на сето тоа ќе се додаде факторот другарство, се добива формула за одлична атмосфера и желба за надградба.
Симон Стојановски вели дека предизвиците со кои се соочуваат се големи, особено поради фактот што кадар за нивната професија во Македонија не може да се најде лесно.
„Секогаш е борба помеѓу моторот во кој работите, со програмите, можеби сакате да додадете десет дрва но не смеете, зошто ќе зема премногу ресурси. Секогаш мора да се најде некој компромис што може да се изведе од самиот енџин а што можете вие, не секогаш е исто, така да тоа е голем проблем и предизвик кога се работи на игри, да се најде некоја златна средина каде што ќе изгледа добро ама и перформансите ќе бидат добри“,
кажа Стојановски.
Бидејќи играта е се уште во фаза на доразвивање, сите карактеристики не се вметнати во демо-верзијата. Според Марко Зарев, играта ќе може да ја играат четворица играчи истовремено, а секој од нив ќе има можност да го истражува градот, притоа комплетирајќи мисии и задачи користејќи интересни оружја и тактики.
„Во ова Скопје, „Скопје 83“, оружјата се строго забранети, ниту полицијате ниту војската не можат да поседуваат и луѓето во Скопје морале да најдат иновативни начини како да се заштитуваат себе си. Затоа сите оружја се склопени од различни алатки, бормашини, пили, колку да имаат нешто. Всушност играчот ги наоѓа тие нацрти во играта и ги копира за да направи свое оружје“,
вели Зарев.
Државата преку Фондот за иновации и технолошки развој финансиски помага на различни претприемачи кои имаат идеја за иновативни и креативни продукти, а тоа било случај и со почетокот на развојот на играта „Скопје 83“.
Иако засега нема прецизен датум кога играта ќе биде целосно функционална, очекувањата се тоа да се случи кон крајот на тековната година. А дотогаш, тимот на DARK-1 Гејминг од Скопје го чека уште работа за довршување на играта, со што македонскиот главен град, се надеваат, ќе стане центар на светот, барем, од „гејмерски“ аспект.