Од 20 декември Швајцарија престана да прифаќа летови од Велика Британија и од Јужна Африка
Стотици Британци, кои планирале да ги поминат своите одмори во швајцарското одморалиште Фербир, тајно ги напуштиле своите хотели откако локалните власти наредија сите британски туристи да бидат ставени под 10-дневен карантин, јави ДПА.
Одлуката за изолирање на новодојденците од Велика Британија беше донесена поради информациите за брзо ширење на новата варијанта на коронавирусот.
Од 20 декември Швајцарија престана да прифаќа летови од Велика Британија и Јужна Африка, каде што исто така е пријавена мутација на коронавирусот. Во исто време швајцарските власти одлучија сите туристи што пристигнале од тие земји по 14 декември да поминат 10 дена во изолација почнувајќи од денот на нивното пристигнување.
Вкупно 420 лица требаше да бидат ставени во карантин, вклучително и швајцарски државјани кои се вратиле во својата татковина откако престојувале во Велика Британија.
Како што пренесува МИА, пријавено е дека 50 лица ја напуштиле Швајцарија веднаш штом дознале за карантинот. Од преостанатите 370 туристи, заклучно со 27 декември, помалку од 12 лица останаа во Фербир.
Голем дел од гостите ги напуштиле хотелите ноќе.
Планинарскиот скијачки центар Фербир, сместен во кантонот Волис, е традиционално популарен кај британските туристи. Некои од Британците што ја напуштија Швајцарија одлучија остатокот од својот одмор да го поминат во соседна Франција, каде што на Британците не им е забрането да ги напуштаат хотелските соби.