Претседателот на Собранието, Талат Џафери, на денешниот брифинг со новинарите посочи дека стоте лаптопи што ги набави Собранието се наменети за собраниската служба, а парите се обезбедени во рамки на Програмата за поддршка на парламентот, финансирана од Швајцарија и спроведувана од НДИ.
Од НДИ појаснија дека програмата ја имплементираат со поддршка од Амбасадата на Швајцарија во Република Северна Македонија, а проектот обезбедува техничка и материјална помош, вклучувајќи и компјутери за собраниската служба, со цел обезбедување непрекината поддршка на пратениците.
„360 степени“ вчера објави дека Собранието се подновило со сто лаптопи, а според набавката, еден лаптоп чини 56 445 денари или 917 евра, без вклучен ДДВ. Од собраниските служби што ја спровеле набавката вчера накусо ни кажаа дека се работи за донација. За подетален одговор побараа прашањата да им ги пратиме преку е-пошта, но не добивме одговор до објавувањето на текстот, а ни потоа.
Договорот е склучен со ИТ-компанијата „Неоком“. Таа е должна во рок од 60 дена да ги испорача лаптопите, кои треба веднаш да бидат приспособени за работа и на секој од нив на декстопот да има документ со упатство за користење.
Во членот 3 од договорот со „Неоком“ пишува дека средствата се обезбедени преку договорот за реализирање на финансискиот придонес во рамките на Програмата за поддршка на парламентот.