Предупредувањето доаѓа додека сојузниците на Вашингтон стравуваат оти поранешниот претседател Трамп би можел да ја олабави посветеноста на клучната американска сила кон НАТО доколку победи на изборите во ноември
Шефот на НАТО во заминување Јенс Столтенберг во својот проштален говор ќе ги предупреди САД и Европа на „изолационизам“, индиректно реферирајќи на можното враќање на Доналд Трамп во Белата куќа.
„Слушнавме гласови од двете страни на Атлантикот кои повикуваат Америка и Европа да се разделат. Фокусирањето на кусогледите национални интереси наместо на долгорочна соработка нема да ни служи. Изолационизмот нема да заштити никого“,
ќе рече тој во говорот попладнево во Брисел, според извадок од текстот што го виделе од АФП.
Предупредувањето доаѓа додека сојузниците на Вашингтон стравуваат оти поранешниот претседател Трамп би можел да ја олабави посветеноста на клучната американска сила кон НАТО доколку победи на изборите во ноември.
Трамп ги вознемири европските земји велејќи дека САД може да престанат да ги штитат членките на НАТО кои не трошат доволно за одбрана.
„Слободата вреди повеќе од слободата на трговијата“
Столтенберг во својот говор, исто така, ќе предупреди дека водењето бизнис со ривали како Русија и Кина никогаш не треба да биде на сметка на безбедноста.
„Слободата вреди повеќе од слободната трговија“,
се вели во неговиот говор.
Но, тој ќе ги предупреди и членките на НАТО дека „протекционизмот против сојузниците не ја штити нашата безбедност“. За потсетување, Франција ги предводеше повиците Европа да изгради сопствена одбранбена индустрија наместо да троши на оружје од САД или Британија.
Едно од најболните поглавја од времето на Столтенберг беше катастрофалното повлекување предводено од САД од Авганистан, што ги остави Талибанците да ја преземат власта.
„Воената моќ има свои граници. Целта на секоја идна воена операција надвор од територијата на НАТО мора да биде јасно дефинирана“,
ќе рече Столтенберг.
На 1 октомври, по една деценија на чело на НАТО, Столтенберг треба да го предаде управувањето со западната воена алијанса на поранешниот холандски премиер Марк Руте.