Генералниот секретар на Алијансата во интервју за германски „Франкфуртер алгемајне цајтунг“ рече дека во неговиот десетгодишен мандат на чело на воениот сојуз најлош ден му бил токму 24 февруари 2022 година, денот кога Русија започна со воената агресија врз Украина
Доколку Украина беше воено посилна, Русија ќе беше претпазлива пред нападот во 2022 година, вели генералниот секретар на НАТО во заминување, Јенс Столтенберг. Според него, НАТО можел да направи повеќе за земјата пред почетокот на војната оти во периодот од 2014 до 2022 година, иако САД, Канада и Обединетото Кралство обучувале украински војници, тоа не било сторено од НАТО како алијанса.
„Сега ја вооружуваме Украина за војна, тогаш можевме да ја вооружиме Украина за да спречиме војна“,
рече Столтенберг.
Столтенберг вели дека тој лично верува оти крајот на војната во Украина ќе дојде на преговарачка маса преку дијалог со Русија, но за да дојде до тој момент, вели, потребно е Украина да ја подобри својата позиција и својата сила.
„Сè уште верувам во дијалог со Русија во комбинација со заштита и одвраќање. Мора да бидеме силни за да водиме значаен дијалог. Се разбира, сега просторот за тоа е многу помал, речиси непостоечки, во споредба со 2014 година. Еден од моите први големи проекти како генерален секретар беше активирање на Советот НАТО-Русија, кој долго време не се состана. Едно е јасно: за да се стави крај на оваа војна, во одреден момент мора повторно да има дијалог со Русија“,
рече тој.
Јенс Столтенберг во октомври годинава ќе ја напушти функцијата генерален секретар на НАТО, што ја извршуваше од 2014 година. Следен шеф на НАТО ќе биде поранешниот холандски премиер Марк Руте. Како потенцијален заменик на Руте, меѓу другото, се споменува и името на поранешната македонска вицепремиерка и министерка за одбрана Радмила Шекеринска.