По коментарите на шефот на кабинетот на Столтенберг, Стијан Јенсен, дека Украина можеби ќе треба да отстапи дел од својата територија на Русија за ставање на евентуален крај на војната, денеска првиот човек на НАТО, Јенс Столтенберг, изјави дека единствено Украина може да одлучи кога ќе има евентуални преговори за крај на војната
Алијансата го нема променето ставот за војната во Украина, па затоа само тие и украинскиот народ можат да донесат одлука за тоа кога би се создале услови за преговори со рускиот окупатор, вели генералниот секретар на НАТО, Јенс Столтенберг.
„Неговата порака (на Јенсен) е иста како мојата порака, која е главната порака на НАТО, а тоа е дека политиката на НАТО не е променета – ја поддржуваме Украина“,
рече Столтенберг.
НАТО на Самитот минатиот месец соопшти дека Украина ќе биде поканета за членство кога „членките ќе се согласат и кога ќе ги исполни условите“, но и дека земјата има право да го избере својот пат независно од Русија.
Украинскиот претседател Володимир Зеленски оцени дека иако исходот од Самитот е добар, би било идеално Киев веднаш да добие покана. Во меѓувреме, западните сојузници на Киев обучуваат илјадници украински војници и Украина е многу зависна од нивното оружје во борбата против руските сили кои започнаа инвазија во февруари 2022 година.