Столтенберг побара од членките на алијансата да достават повеќе оружје во Украина

Во интерес на нашата безбедност е да се осигураме дека Украина ќе надвладее и дека рускиот претседател Владимир Путин нема да победи, вели генералниот секретар на НАТО

Генералниот секретар на НАТО Јенс Столтенберг побара од членките на Алијансата да достават повеќе оружје во Украина.

„Во интерес на нашата безбедност е да се осигураме дека Украина ќе надвладее и дека рускиот претседател Владимир Путин нема да победи“,

рече Столтенберг во интервју за ДПА.

Тој додава дека можеби е поважно за Украина да добие доволно муниција за вооружените системи што веќе ги има, додавајќи дека потребата од муниција и резервни делови е „огромна“.

„Можеби звучи парадоксално, но воената поддршка за Украина е најбрзиот пат за мир. Знаеме дека повеќето војни завршуваат на преговарачката маса – и оваа војна веројатно така ќе заврши, но знаеме дека она што Украина може да го постигне во овие преговори е нераскинливо поврзано со воената ситуација“,

рече Столтенберг.

Генералниот секретар на НАТО јасно стави до знаење дека неодамнешните украински напади врз воени цели во Русија ги смета за целосно легитимни.

„Секоја земја има право да се брани – вклучително и Украина“,

рече тој, објаснувајќи дека украинските напади мора да се гледаат во контекст.

Ова, рече тој, вклучува масовни руски напади врз цивилната инфраструктура, чија цел е да ги остават Украинците без вода, струја и греење во зима.

Запрашан дали мисли дека е добра идеја да се испорачаат ракети со среден дострел во Украина, Столтенберг рече „дијалогот меѓу сојузниците и со Украина за конкретни системи“ продолжува.

Тој посочи дека земјите од НАТО веќе и доставиле на Украина системи за оружје со долг дострел, како што се ракетни фрлачи Химарс и артилерија со долг дострел.

„Се испорачуваат и дронови и оклопни возила“,

рече Столтенберг. 

Минатата недела Вашингтон најави дополнителна воена помош за Киев, вредна речиси 2 милијарди долари, вклучувајќи ги и ракетните системи „Патриот“.