Тој вели дека се подготвени во секој момент на предвремени избори, но таквите, како што рече, нема да ги има заедно со локалните во октомври
Владата ќе работи нормално и ќе има скоро двотретинска поддршка во Собранието. Ова е коментарот на пратеникот Бојан Стојаноски од ВМРО-ДПМНЕ, а во врска со изјавата на Халил Снопче од Алијанса за Албанците на Арбен Таравари кој рече дека ако нивната партија е надвор од Владата, неминовно доаѓа до прашањето за нови парламентарни избори.
„Неколкупати сме кажале дека мнозинството неофицијално брои две-третини односно над 80 пратеници. Јас ве уверувам дека и покрај таа ситуација, доколку стане актуелна и се случи, Владата ќе функционира сосема нормално и подобро од претходно“,
рече Стојаноски.
Тој вели дека се подготвени во секој момент на предвремени избори, но таквите, како што рече, нема да ги има заедно со локалните во октомври.
Халил Снопче, пратеник од крилото на Алијансата на Албанците, предводено од Арбен Таравари, денеска во изјава за медиумите рече дека како партија се отворени за сите опции, дека Алијансата на Албанците може да биде и опозиција, но, нагласи, „доколку тие се надвор од Владата, тоа ќе значи потреба од нови парламентарни избори“.
Снопче вели дека без разлика што Владата ќе има бројки и без Алијанса за Албанците, таа Влада ќе биде нестабилна со само девет албански пратеници.