Од ВМРО-ДПМНЕ прашуваат и дали по поплавата е направено испитување на електричната инсталација ако се има предвид дека од нејзината исправност зависат апарати и инструменти кои имаат животовитално значење за пациентите
Поплавата во КАРИЛ не се чисти само со џогер, дали се направени микробиолошки брисови поради опасност од инфекции, праша денеска на прес-конференција пратеничката од ВМРО-ДПМНЕ, Дафина Стојаноска, откако беше објавено дека по поплавата што ја зафати Клиниката за анестезија, реанимација и интензивно лекување, истата повторно работи.
Оваа Клиника, рече пратеничката, не е обична гаража или подрум, од којшто треба да се испумпа само водата и да се зачисти со џогер.
„Доколку Клиниката била поплавена од излевање на атмосферска канализација или други води до степен да препраќа пациенти, тогаш овде се работи за многу сериозен и темелен процес на враќање во функција. Не смее брзоплетоста на надлежните да чини животи. Оваа Клиника е мошне сериозен и чувствителен дел од здравствениот систем и терцијарното здравство и не смее да се дозволи на каков било начин да се случуваат интерхоспитални инфекции. Што е преземено за санирање на поплавите во КАРИЛ? Дали се направени микробиолошки брисови од страна на Центарот за јавно здравје?“,
рече Стојаноска.
Таа праша и дали Министерството за здравство и Државниот санитарен и здравствен инспекторат се вклучени и запознаени со активностите за враќање на Клиниката во функција, но и дали е направено испитување на електричната инсталација ако се има предвид дека од нејзината исправност зависат апарати и инструменти кои имаат животовитално значење за пациентите.
За време на невремето на 30 август, Клиниката се затвори и пациенти се препраќаа во останатите болници во Скопје и во државата, а еден ден потоа во јавноста.
Ден по поплавата, оттаму изјавија дека КАРИЛ функционира нормално, но со намален капацитет.