Возење со ратраци надвор од предвидените рути на Шара, истекувањето течен отпад од биогасна централа во Вардар и загадувањето на велешкото езеро Младост се меѓу случаите на кои работел и Државниот инспекторат за животна средина изминатиов период
Од вкупно 23 инспектори во Државниот инспекторат за животна средина (ДИЖС), 14 се над 57 години. Директорот на ДИЖС, Сретен Стојковски, на денешната прес-конференција, меѓу другото, информира дека старосната структура на инспекторите е проблематична. Во наредните шест месеци во пензија одат уште двајца.
„Потполноста на систематизацијата согласно на работните места е некаде околу 50,9 проценти. Годишниот план за вработување за 2024, каде што баравме двајца инспектори и три административни работници е одбиен од Министерството за финансии. Даден е нов план за тројца инспектори и сега уште е на одобрување во ново Министерство за јавна администрација. Еден овластен инспектор за животна средина е во постапка на преземање, остана да се добие согласноста од Министерството за финансии. Согласно од нацрт-записникот од првата седница на Владата на РСМ од 28.06.2024, сите постапки за вработување на неопределено време и унапредување за 2024 година се запираат. Што значи дека до крајот на годината дали ќе имаме вработување на инспектори за животна средина“,
кажа Стојковски денеска.
Презентирајќи го полугодишниот извештај, Стојковски кажа дека од планирани 721 инспекциски надзор, Инспекторатот реализирал 812. Изречени се 166 решенија за утврдени неправилности, како и прекршочна постапка во износ помал од 300 илјади евра.
„Се однесува на еден субјект во Гевгелија, свињарска фарма, каде што имавме истекување отпадот од дејноста што ја вршат и каде што беше предвидена санкција од 200 000 евра. Постапката се спроведе пред Комисијата за спогодување и правниот субјект бил задолжен да направи таложни резервоари за отпадот и да не дозволи понатамошно истекување. Доколку не го изреализира тоа во текот на шест месеци, ќе биде наплатена санкцијата“,
кажа Стојковски.
Со ратраци се возеле надвор од предвидените рути на Шара
Покрај свињарската фарма во Гевгелија, ДИЖС изминатиов период добил пријава и дека две фирми во Тетовско се движеле со ратраци надвор од предвидените рути за моторни возила во Националниот парк „Шар Планина“.
„По барање на Националниот парк е поведена постапка и, бидејќи не сакале да се спогодат, постапката се води пред Основниот суд Тетово“,
кажа Стојковски.
Тој додаде и дека инспекторите изготвуваат решение и за биогасната централа која предизвика истекување на течен отпад, односно ѓубриво во Градско, што предизвика помор на риби во Вардар.
„Согласно елаборатот, течниот отпад се собирал во одреден резервоар, но, при увидот на 27.7. е констатирано дека овој течен отпад кој се користи како ѓубриво е собран и транспортиран на соседна парцела без дозвола. Направена е лагуна и истата е пробиена, односно течното ѓубриво е истечено во соседните парцели и реката Вардат. Согласно закон, за овој прекршок е предвидено санкција од 110 до 120 илјади евра, значи правното лице е среден трговец, и исто така 6 илјади евра за одговорното лице. Инспекторот го изготвува решението и се очекува да го достави на правното лице“,
кажа директорот.
Во однос на актуелното загадување на велешкото езеро Младост, и од ДИЖС потврдија дека водата не е добра ниту во однос на физичко-хемиските карактеристики ниту во однос на микробиолошките карактеристики. И покрај тоа што функционира колекторскиот систем, анализите покажале дека има и фекално загадување.
Од Инспекторатот упатуваат апел и од граѓаните да не ги палат стрништата.