Со одлуката, протестот на ССКЦ најавен за утре во Клиничкиот центар нема да се одржи. Покачување на плата ќе добијат медицинските сестри, болничарите, стоматолошките сестри, лаборантите, рендген-техничарите. Постигнат е и договор за здравствената администрација да остане како дел од здравството, а не да премине во јавна администрација
Самостојниот синдикат на Клинички центар (ССКЦ)и Владата постигнаа договор за покачување на нето платата за 2.000 денари на вработените во Клиничкиот центар, а дополнително ќе се исплаќа и ноќен и минат труд, како и додатоци, јавува МИА.
Ова, како што изјавил за МИА, потпретседателот на Самостојниот синдикат на Клинички центар, д-р Предраг Серафимовски ќе почне да се применува со исплатат на февруарската плата во 2023 година.
Тој додал дека договорот меѓу Синдикатот и Владата е постигнат денеска и дека сите одлуки се во согласност со нивните претходни барања.
Покачување на плата ќе добијат медицинските сестри, болничарите, стоматолошките сестри, лаборантите, рендген-техничарите. Постигнат е и договор за здравствената администрација да остане како дел од здравството, а не да премине во јавна администрација.
„Обемот на работа на здравствената администрација е многу голем, а и нивните плати се поголеми поради тежината на работата“,
вели Серафимовски.
Исто така, прифатена е и понудата да не се менува поединечниот колективен договор на докторите за додатоци на плати и дежурства. Во однос на Колективниот договор прифатено е барањето да не се брише Поединечниот колективен договор на Клинички центар и да не се воведе унифициран колективен договор.
„Со воведување унифициран колективен договор нема да можеме да потпишуваме договори за покачување на плати, нема да бидеме заштитени“,
додаде потпретседателот на ССКЦ.
Самостојниот синдикат на Клинички Центар претходно одржа состанок со претседателите на 56 синдикални организации. На барање на ССКЦ присуствувале и министерот за здравство Беким Сали и заменик-министерот Владимир Рендевски кои ја презентирале одлуката. Само двајца членови биле против овие одлуки, додека сите останати ја прифатиле.
Со одлуката на Советот, најавениот протест на ССКЦ утре нема да се одржи во Клиничкиот Центар.