Како што потсетуваат од Јавното обвинителство, станува збор за акција што албанската полиција ја реализира на почетокот на октомври 2013 година, кога беа запленети 1 077 икони, артефакти, бронзени и други предмети, што потекнуваат од средниот век. Меѓу запленетите икони беше утврдено дека 21 икона потекнуваат од македонските цркви и манастири. По завршената тамошна постапка и деветгодишни административни преговори, минатата недела владите на двете земји се договорија по ратификација на договорот иконите да бидат вратени во земјава
Новиот шеф на Основното јавно обвинителство за гонење на организиран криминал (ОЈО ГОКК), Ислам Абази, денеска имал средба средба со амбасадорот на Албанија во земјава Фатос Река, прва по неговиот избор на оваа исклучително важна функција, за што сè уште не стивнуваат реакциите во јавноста.
Амбасадорот му го честитал изборот на Абази и му посакал успешно раководење со Обвинителството.
На средбата, како што се наведува во соопштението, била истакната заложбата за продлабочување на соработката во областа на борба против тероризмот, корупцијата, економскиот и компјутерскиот криминал, како и меѓународниот организиран криминал.
„Абази на амбасадорот му ги презентираше условите за работа и предизвиците со кои се соочува Основното јавно обвинителство за гонење организиран криминал и корупција и ја истакна потребата за понатамошно унапредување на институционалната соработка меѓу двете земји“,
се наведува во соопштението.
Амбасадорот на Албанија на средбата изразил задоволство за досегашната соработка помеѓу органите на прогонот двете земји и се заблагодарил за несебичната размена на доказите што беа од исклучително значење за албанското обвинителство во предметот „Икона“.
Како што потсетуваат од Јавното обвинителство, станува збор за акција што албанската полиција ја реализира на почетокот на октомври 2013 година кога беа запленети 1 077 икони, артефакти, бронзени и други предмети, што потекнуваат од средниот век. Меѓу запленетите икони беше утврдено дека 21 икона потекнуваат од македонските цркви и манастири.
Доказите за извршените кражби на македонските културни добра, јавен обвинител од Основното јавно обвинителство за гонење на организиран криминал и корупција со поддршка на Германската канцеларија за меѓународна помош ги достави до албанското обвинителство.
По завршената тамошна постапка и деветгодишни административни преговори, минатата недела владите на двете земји се договорија по ратификација на договорот иконите да бидат вратени во земјава.
Во меѓувреме, не стивнуваат реакциите околу изборот на Абази за нов шеф на ОЈО ГОКК, но и реакциите за реакцијата на амбасадорката на САД во земјава, Анџела Агелер која остро го критикуваше изборот на нов шеф на Основното јавно обвинителство за гонење организиран криминал и корупција.
На барањето на „360 степени“ за став за целиот процес и епилогот од него, како ретко кој дипломат на САД, па и воопшто кој било дипломат во земјава, таа изрази отворено незадоволство од начинот на кој Ислам Абази стана шеф на обвинителството што треба да ја предводи борбата против корупцијата.
Во писмениот одговор на прашањата на „360 степени“ амбасадорката и Амбасадата јасно наведоа дека очекувале повеќе и поради милионите долари потрошени во обуки на обвинителите кои, патем, самите гласаа за шеф на ОЈО за ГОКК. Се додава и дека граѓаните заслужуваат независен правосуден сектор и дека политичкото мешање нема место во овие постапки.