Заеднички е констатирано дека политичката волја за изнаоѓање решенија е европски начин на однесување и придобивките се обострани
Поддршка за пристапниот процес на Северна Македонија кон ЕУ е изразена на денешната средба на премиерот Зоран Заев со Димитрис Јанакакис, амбасадор на Грција, кој го завршува својот мандат во нашата држава.
Заев, како што соопштија од Владата, му се заблагодарил на амбасадорот Јанакакис за неговиот конструктивен придонес во Договорот од Преспа, како и за искрените заложби за унапредување на односите помеѓу двете држави и народите во нив.
Заеднички е констатирано дека политичката волја за изнаоѓање решенија е европски начин на однесување и придобивките се обострани: бенефити во квалитетот на живот на граѓаните на двете држави, како и стабилност и просперитет, соопштија од Владата.
„Активно продолжуваме со реформските процеси дома и со политиките на дијалог, пријателство и добри односи со соседите бидејќи нашата иднина е европска. Благодариме за поддршката од Република Грција и во реализацијата на оваа стратешка цел за нашата држава“,
рече премиерот Заев.
На средбата е разговарано за унапредувањето на економската соработка, преку поголема соработка на стопанските комори, во делот на инфраструктурата, за меѓуграничните олеснувања на движењето на граѓаните. Констатирано е дека продолжува соработката на двете држави и во време на пандемијата и се гледаат големи можности за нејзино интензивирање, во сите области.