Од Министерството информираат дека се разговарало за зајакнување и унапредување на условите и за пациентите и за здравствените работници
Азир Алиу, министерот за здравство, денеска остварил средба со директорите на Клиниката за кардиологија и на Клиниката за државна кардиохирургија, Даница Петкоска Спирова, односно Дејан Димитровски.
Од Министерството информираат дека на средбите се разговарало за актуелните состојби во двете здравствени установи, како и за можностите за нивно зајакнување и унапредување на условите и за пациентите и за здравствените работници.
Оттаму велат дека се разговарало и за тековните предизвици со кои се соочуваат Клиниката за кардиологија и Клиниката за државна кардиохирургија, имајќи предвид дека секојдневно третираат исклучително комплексни и тешки случаи.
Претходно, Алиу оствари средба и со кардиохирургот д-р Сашко Кедев на која разменија информации во врска со наводите дека се вршеле непотребни кардиолошки интервенции кај пациенти во приватните болници.
Министерот Алиу посочи дека ќе испрати допис со кој сите приватни здравствени установи ќе се задолжат од 15 септември да го информираат ресорното министерство, односно Управата за електронско здравство за сите извршени прегледи и интервенции.
Воедно, од Министерството за здравство ги повикаа сите засегнати страни што имаат каква било информација за неправилности во системот веднаш да се обратат до нив.