„Во наредниот период како долгорочно решение ќе предложиме од денот на распишувањето до денот на изборите да се создаде преоден дел од владата со две министерства предводени од опозицијата, за да можеме да кажеме дека имаме фер избори“, изјави денеска пратеникот на опозициската коалиција Радомир Лазовиќ
Опозициската коалиција „Србија против насилството“, денеска презентираше материјал со список на барања кои, според неа, треба да ги подобрат изборните услови во земјата, а меѓу другото вклучуваат и формирање независна комисија, додека како долгорочно решение се предлага преодна влада по урнек на техничката влада во Северна Македонија.
Барањата во името на коалицијата ги претстави народниот пратеник Радомир Лазовиќ на прес-конференција во Народното собрание. Тој побара собранието да формира посебна Комисија за организирање избори, во која ќе членуваат претставници на власта, опозицијата и граѓанскиот сектор, со надзорни и извршни овластувања.
„Долгорочно ќе предложиме измени на законот, да има преодна влада по примерот на Северна Македонија, каде опозицијата ќе предложи најмалку двајца министри за локална самоуправа и МВР од објавата за избори“,
рече Лазовиќ, пренесува Н1.
Тој кажа дека концептот на преодна влада во моментов е актуелен во Северна Македонија.
„Телото што го предложивме треба да биде во функција до следните избори бидејќи можеби нема да има време да се направат промени кои би доведеле до преодна влада. Во наредниот период како долгорочно решение ќе предложиме од денот на распишувањето до денот на изборите да се создаде преоден дел од владата со две министерства предводени од опозицијата, за да можеме да кажеме дека имаме фер избори“,
појасни тој.
Инаку, преодната или техничка влада во земјава се формира на 100 дена пред одржувањето на парламентарни избори и трае до нивното завршување, а произлезе од пржинскиот договор по политичката криза во 2015 и 2016 година.
Меѓу другите барања, инаку вкупно шест на број, го опфаќаат Избирачкиот список, кој според Лазовиќ мора да се регулира и посочи дека ова прашање мора да се реши пред да се распишат следните избори. Ова треба да овозможи тим од меѓународни и домашни претставници назначени од опозицијата да имаат увид во Избирачкиот список.
Од „Србија против насилството“ бараат и целосна ревизија на Избирачкиот список, која би опфатила теренска контрола во која би учествувала независна комисија според методологијата изработена од невладината организација „Црта“. На списокот е и барањето на локалните избори да можат да гласаат само оние што имаат пријавено живеалиште во општината и градот најмалку шест месеци пред изборите.
Лазовиќ изјави и дека собранието треба да донесе обврзувачки упатства за медиумите за донесување нови програми, забрана на говор на омраза и лаги и надворешен надзор. Упатството треба да го подготви независна комисија за медиуми составена од претставници на професионални здруженија.
„За да се овозможат овие и други мерки наведени во овој документ, неопходно е Народното собрание да донесе lex specialis со привремена важност што би ги вклучил сите овие мерки“,
рече Лазовиќ и додаде дека собранието треба да го усвои извештајот за наодите на ОДИХР, владата да обезбеди спроведување на сите барања наведени во овој документ, а доколку дојде мисија на Европскиот парламент да може целосно да учествува во контролата на нивното спроведување.
Наодите за претходниот изборен процес, според Лазовиќ, покажале дека тој бил длабоко изманипулиран од Српската напредна партија и оти секој дел од процесот се одвива под сенката на нивната ненаситна волја за власт.
„Од тоа кој може да се кандидира, до кој може да гласа, до злоупотреба на медиуми, притисоци врз гласачи и кражби на денот на изборите. Ова значи дека ни требаат фундаментални решенија за да дојдеме до вистински фер избори“,
рече тој.
На прашањето дали коалицијата смета дека 2 јуни е добар датум за новите избори во Белград, кој вчера го спомена Вучиќ, тој рече: „Не зборуваме за датумот, туку за условите што мора да се исполнат… Сакаме избори во рок што ќе овозможи да се исполнат изборните услови. Не сакам да лицитираме со датуми како тој што ги украде изборите“.
На барањата на „Србија против насилството“ денеска реагираше српската премикерка со технички мандат, Ана Брнабиќ, која на социјалоната платформа Икс напиша дека тие се продолжение на маѓепсаниот круг.
„Сакам да влезам во влада, немам мнозинство, барам преодна влада – нема преодна влада, сакам избори – не ми се допаѓа резултатот од изборите. Сакам преодна влада. Тригодишно дете има повеќе логика и доследност“,
напиша таа.
Брнабиќ изјави дека опозицијата барала итни парламентарни и избори во Белград, што ѝ ги добила пред крајот на 2023 година.
„Сакаа нови избори во Белград, ги имаат. Сакаа тие избори да се одложат што е можно повеќе и тоа го добија“,
напиша таа во објавата.
Они који су заклетву положили у ходнику Скупштине, газећи правила, процедуре, традицију и достојанство, и Народне скупштине и свих грађана Србије, кажу да је @avucic “згазио” парламент јер је саопштио нешто што је наложио и потписао председавајући, проф. Раденовић.
— Ana Brnabic (@anabrnabic) March 11, 2024
Исти ти,… https://t.co/SLD88swFdI
Инаку, за потсетување, на 17 декември лани во Србија се одржаа вонредни парламентарни, покраински и локални избор. На изборите во Белград, владејачката Српска напредна партија доби најмногу гласови, но не доволно за да формира влада во главниот град. Опозицијата ја обвини владејачката СНС за кражба на изборите во Белград. Со забелешки за текот на изборниот процес излегоа и меѓународни и домашни набљудувачки мисии.
Канцеларијата на ОБСЕ за демократски институции и човекови права (ОДИХР) во извештајот наведува дека на изборите на 17 декември условите не биле еднакви за сите бидејќи на нив доминантна била улогата на претседателот на државата и функционер на СНС, Александар Вучиќ.
Власта ги негира наводите за изборни нерегуларности, со оценка дека декемвриските избори биле меѓу најчистите. Претседателот на Србија и функционер на Српската напредна партија, Александар Вучиќ, вчера најави дека повторените избори во Белград ќе се одржат на 2 јуни. Тој еден ден претходно изјави дека изборите во Белград може да се одржат на 28 април или на 5 мај.