Уште една од мерките е намалување на бројот на патници во јавниот превоз до 30 лица
Србија вчера регистрира рекорд од над 6 000 заразени во 24 часа
Кризниот штаб на Србија утрово закажа итна седница поради моменталната неповолна епидемиолошка состојба, за која главниот епидемиолог д-р Предраг Кон нагласи дека е катастрофална.
Во Србија вчера беше регистриран најголем број заразени лица од почетокот на пандемијата – 6 109, а починаа 29 лица за 24 часа. На респиратори се 186 пациенти, соопшти Министерството за здравство.
Од вторникот стапија во сила нови мерки со кои се ограничи работата на угостителските објекти, продавниците, трговските центри, од 21 до 5 часот наутро, а ноќниот превоз во Белград беше укинат. Експертите велат дека ефектите од тие мерки ќе бидат видливи за десет дена, под услов сите строго да се придржуваат до нив, покрај сите претходно донесени.
Сепак, ситуацијата се влошува од ден во ден и се пополнуваат речиси сите болнички капацитети. Најтешко е во Белград, каде што вчера почнаа да се превезуваат пациенти со ковид-19 до Параќин.
Специјалистите за инфективни болести инсистираат на ограничување на бројот на луѓе во јавниот превоз, а единствената дилема е дали да се фиксира на максимум 25 или 30 патници, пишува весникот „Вечерње новости“, пред денешната седница на Кризниот штаб.
Потенцијалната мерка, пишува весникот, повикувајќи се на експертски извори, ќе значи дополнително скратување на работното време на трговците и угостителите до 18 часот.
Мерката што исто така ќе се разгледува денеска е дали да се зголеми растојанието на повеќе од два метра, што посебно се однесува за продавниците.