Српскиот епископ кажал „Вартоломеј не е папа, нема власт над Црквата и нема полномоштво да доделува автокефалија на ниту една од структурите на помесните цркви“
Српската православна црква, преку викарот на патријархот Порфириј, епископот моравички Антониј, се закани дека е можен раскол со Вселенската патријаршија ако биде признаена автокефалноста на МПЦ-ОА.
Константинополскиот патријарх Вартоломеј во Украина направи преседан, кој, во случај да биде повторен на Балканскиот Полуостров, може да доведе до прекин на евхаристиското општење на СПЦ со Фанар, кажал епископот Антониј на меѓународната богословска конференција во Киев „Соборноста на црквата: богословски, канонски и историски измеренија“, соопшти на својата фејсбук-страница Центарот за информации на Московската патријаршија во Украина.
„Доколку бидат донесени какви било решенија по прашањето на Македонија и Црна Гора, може во најбрзо време да се очекува таква несреќна појава, која може да го наруши евхаристиското општење меѓу Константинопол и Српската црква“,
рекол епископот Антониј.
Игнорирајќи го фактот дека и СПЦ и РПЦ имаат добиено автокефалија од Вселенската патријаршија, српскиот епископ го фокусирал своето излагање околу темата „Вартоломеј не е папа, нема власт над Црквата и нема полномоштво да доделува автокефалија на ниту една од структурите на помесните цркви“.
СПЦ е во повеќедецениски спор со МПЦ-ОА, оспорувајќи ја нејзината автокефалност. Разговорите што повремено се водат не доведоа до позитивен исход, поради што МПЦ-ОА за решавање на својот статус се обрати до Фанар и вселенскиот патријарх Вартоломеј.