Коментирајќи за посетатат на премиерот на Брисел, претседателот на Градскиот комитет на ВМРО-ДПМНЕ вели дека во овој момент не треба да се креваат надежите, за да не дојде до големо разочарување
Македонија нема друга опција освен ЕУ, но датумот за почеток на преговори не е копче кое преку ноќ ќе ни го подобри животот. Во овој момент во Македонија имаме деградација на правосудниот систем, гледаме скандали и тонеме, по сите параметри за корупција и криминал, оцени во гостување на ТВ 24 Владимир Нелоски, претседател на Градски комитет на ВМРО-ДПМНЕ.
Нелоски посочи дека во денот кога Заев е во Брисел, еден од најголемите турски криминалци објави снимка каде што кажува дека се дружеле во домашна атмосфера.
„ЕУ едноставно не сака да седи на иста маса со партнер кој собира мафијаши и криминалци дома“,
нагласи Нелоски.
Тој додаде дека во овој момент не треба да се креваат надежите, за да не дојде до големо разочарување, како што рече, како што беше селфито во авион дека сме добиле датум, а таков датум немаше.
Неловски оцени и дека политичката ситуација во Бугарија не ветува дека ќе се реши проблемот кој се создаде со потпишување на Договорот за добрососедство.
„Власта, кога ги потпишуваше договорите со Бугарија и со Грција, велеше дека се затворени сите прашања, а гледаме дека еден од тие договори извади нови прашања и блокади кои ни стојат на патот кон ЕУ“,
вели Неловски.
Според него, друг проблем за државава е тоа што власта се однесува како да сме еднопартиски систем и, како што оценува, го одбива кој било предлог за кој било закон од опозицијата.
„Кога власта не сака да разговара со опозицијата за прашања важни за граѓаните, тогаш опозицијата си има демократски алатки да им каже да се свестат. Опозицијата мора да биде вклучена во процесите. Ние како опозиција бараме какви било опции во Собранието за да има дискусија. Одбивањето на дискусија и амандмани од страна на власта личи како на еднопартиски систем и едноумие. Таму каде што се граѓаните и нивниот интерес под прашање ние ги подржуваме тие решенија, но не може да бидат одбиени нашите предлози кои се за подобрување на законите“,
нагласи Нелоски.