„Joint Combined Exercise Training – 23“ е заедничка вежба на С Македонија, Албанија и САД што ќе се одржи во Скопје од 20 август до 1 септември
Одлука за влегување и престој на странски вооружени сили на територијата на Република Северна Македонија заради учество на заедничка обука и вежба „Joint Combined Exercise Training – 23“ донесе Владата на денешната седница.
„Заедничката обука и вежба „Joint Combined Exercise Training – 23“ е дел од Планот за билатерална соработка за 2023 година помеѓу Министерството за одбрана на Република Северна Македонија и Министерство за национална одбрана на Соединетите Американски Држави“,
соопшти Владата.
Оттаму додаваат дека Армијата на Република Северна Македонија активно ќе учествува во подготовките и изведувањето на заедничката обука и вежба што ќе се одржи од 20 август до 1 септември. На активноста ќе учествуваат и вооружените сили на Република Албанија.
„На вежбата е предвидено учество на десет припадници од специјалните сили на вооружените сили на САД и 12 припадници на вооружените сили на Република Албанија, со вооружување, опрема, моторни возила и материјално-технички средства. Локација за учество на вежбата ќе бидат полигоните за обука и стрелиштата за изведување на гаѓања во касарните ‘Илинден’ – Скопје, ‘Страшо Пинџур’ – Петровец и ‘Ѓорче Петров’ – Скопје“,
соопшти Владата.