Речиси 900 000 луѓе во пет провинции живеат во области директно погодени, во различен степен, од невремето и поплавите во Либија
Тим италијански пожарникари во Либија интензивно работи на отстранување на последиците од смртоносната поплава. Тие се во потрага по трудница и двегодишно девојче за кои се верува дека се затрупани под урнатата зграда. Италијанскиот тим беше една од неколкуте групи кои копаа низ наноси од кал и издлабени згради во потрага по тела и можни преживеани.
На стотици илјади луѓе итно им е потребна помош, соопшти Канцеларијата на ОН за координација на хуманитарни прашања. Во итен апел, Канцеларијата побара помош од 71,4 милиони долари за да се задоволат најитните потреби на 250 000 од 884 000 луѓе за кои се проценува дека им е потребна помош во следните три месеци.
Речиси 900 000 луѓе во пет провинции живеат во области директно погодени, во различен степен, од невремето и поплавите во Либија.
Силна бура наречена Даниел ја зафати Либија пред една недела, откако претходно мина низ Грција, Бугарија и Турција. Две брани пукнаа во планините над пристаништето Дерна, уништувајќи големи делови од градот со 100 000 жители.