Во земјава тие ќе бидат сестени во мотели, а нивниот престој ќе го плати организацијата која ги носи, или за која работеле, додека државата, како што рече, ќе обезбеди целосна општествена поддршка, односно лекарски прегледи и се друго што ќе биде потребно
Владата презеде обврска да сместиме околу 450 лица од Авганистан. Тие нема да бидат сместувани во никакви кампови, во никакви прифатни центри, ниту во Табановце, ниту во Гевгелија, ниту во центар за странци, туку во хотели и во мотели, изјави вечерва министерот за внатрешни работи Оливер Спасовски, во интервју за ТВ 21.
Нивниот престој ќе го плати организацијата која ги носи, или за која работеле, а државата, како што рече, ќе обезбеди целосна општествена поддршка, односно лекарски прегледи и се друго што ќе биде потребно.
„Владата ги задолжи МВР и Агенцијата за национална безбедност да ги спроведеме постапките што ќе значат добивање на виза за да можат да влезат на територијата на Република Северна Македонија овие лица. Ние ги очекуваме податоците, списоците за лицата кои ќе пристигнат, имаме за шест лица потврда, имаме за 180 лица кои се подготвуваат за кои се уште немаме точен датум или временси период во кој ќе пристигнат да ги провериме соодветно. Во тој момент кога ќе пристигнуваат ќе се завршат проверките и тие лица ќе дојдат и бидат сместени во хотелите“,
рече Спасовски.
Тој ги нарекува шпекулации информациите со кои се предизвикува вознемиреност во јавноста, бидејќи се нарекуваат екстермисти, милитанти… Со оглед на тоа дека овие лица работеле за САД, како и за меѓународни организации, тоа се лица кои биле проверувани од безбедносен апсект, вели Спасовски.
„Тука не станува збор за никакви милитанти, екстремисти кои доаѓаат, туку граѓани, цивили, високообразовани, луѓе кои се залагале за човекови права. Ќе бидат тука одреден временски период и после тоа заминуваат или во САД или во некоја друга држава каде што им се обезбедува можност за престој“,
објаснува Спасовски.
Портпаролот на Владата, Муамет Хоџа, на денешната прес-конференција рече дека до крајот на неделава, зависно од околностите на аеродромот во Кабул, се очекува да пристигнат со организирани летови најголем дел од 450–те граѓани од Авганистан.
Тој напомена дека не постои ризик од мигрантска криза, ниту пак, како што потенцира, оваа хуманитарна операција треба да се поврзува со Прифатниот центар за странци или мигрантските кампови на северната и јужната граница од нашата држава, туку е дел од голема светска хуманитарна акција.