Сè е подготвено да се справиме и ефикасно да ги спроведеме мерките и активностите за справување со кризната ситуација во Дебар и Центар Жупа, порача премиерот Оливер Спасовски на денешната прес-конференција откако вчера беше воведена кризна состојба на територијата на двете општини во траење од 30 дена.
„Сите институции стручни за организирање и спроведување на мерките се на терен. Првата ноќ мина мирно без никакви инциденти или движење на населението. Така е и денес во претпладневните часови. Најважно е сега граѓаните на двете општини на таков начин да го дадат својот придонес за справување со ситуацијата“,
апелираше Спасовски.
Рестораните, кафулињата и други угостителски објекти во Дебар и Центар Жупа се затворени, банките и поштите ќе работат со скратено работно време, а граѓаните да седат дома. Да излегува само по еден член од семејството ако има потреба да се заврши некоја обврска, порача Спасовски.
Од овие две општини ќе може да се излегува само ако станува збор за животнозагрозувачка состојба на негово и тоа со возило на Итната медицинска помош и со потврда од претставниците на Министерството за здравство.
Ова Министерството заедно со МВР е задолжено да ја спроведува забраната за излегување на населението, а во обезбедување и контрола на загрозеното подрачје вклучена е и Армијата. Според акциониот план, Дирекцијата за заштита и спасување, пак, е задолжена за дезинфекцијата во општините, а Центарот за управување со кризи и МВР има задолжение да обезбедат услови за континуиран транспорт на намирници и енергенси за потребите на граѓаните.
На граѓаните на Дебар и Центар Жупа, Спасовски им порача дека најважно во ваква ситуација е почитување на препораките, да нема собири, да се спроведува мерката за домашна изолација и да нема контакти со изолирани или заболени лица.
„Бидете уверени и верувајте дека ова е најдоброто решение, ова е решение кое најбргу ќе даде резултати. Ве замолувам да нема паника, воспоставен е институционален систем. Заедно со вашите први луѓе во општината ќе ги обезбедиме сите услови за да добиете сè што е потребно“,
рече Спасовски.