Против осомничените полициски и царински службеници, како што најави Спасовски, ќе биде поведена дисциплинска постапка
На денешната прес-конференција министерот за внатрешни работи Оливер Спасовски сподели детали од акција на МВР, во која бил пресечен меѓународен канал за шверцување и неовластена трговија со дрога и прекурсори, а на 21 декември беа приведени 10 лица, помеѓу кои тројца службеници на МВР и петмина службеници на Царинската управа.
„Со фактура за мобилна галантерија во Македонија биле внесени таблети кои не се регистрирани во Агенцијата за лекови. Полициски службеници асистирале, а еден од нив имал и задача да биде чистач на патот за да се пренесе стоката. Самиот влез на овие таблети е кривично дело“,
изјави Спасовски.
За сите царински службеници има докази дека се инволвирани во шверцувањето на овие таблети, кои во документите биле пишани како мобилна галантерија.
„МВР заедно со австриската полиција во Виена запре огромна пратка од 2,2 тони, ист тип медикаменти, кои се прекурсори, а крајна дестинација требало да е во Скопје“,
додаде Спасовски.
Приведените се на возраст од 35 до 55 години, а Спасовски посочи дека МВР ќе продолжи со овие акции, иако постои политичка партија која, како што вели, сака да го саботира овој процес и за тоа веќе е известено и обвинителството.
„Прес-конференциите и шпекулациите од политичка партија беа со цел да се уништи оваа истрага. Основата не може да биде ти реков – ми рече муабети, а истрагата не може да се темели врз шпекулации. Во повеќе наврати сум споменал дека изнесувањето информации од истрага, кои се базираат на шпекулации, е штетно за истрагата. Паралелна истрага од аматери им помага на криминалците да се извлечат, а тоа ги прави соучесници во делото. Во неколку наврати МВР испрати до ОЈО известување за овие активности и очекувам да се бара одговорност за ваквите постапки“,
рече Спасовски.
Против осомничените полициски и царински службеници, како што најави Спасовски, ќе биде поведена дисциплинска постапка и тие ќе бидат суспендирани од работа.